Czilenôsce miechów ze smiecama zabrónëch z szasëjów i ùprawiony wëzdrzatk rzéczi miałë bë zachãcëc mieszkańców do tegò, żebë miec wikszą starã ò pòspólną òbéńdã żëcô.
W niedzelã dwadzestégò sódmégò łżëkwiata cyklicznô akcjô sprzątaniô gardu Réda sparłãczëła sã z òglowòpòlską akcją „Òperacjô Czëstô Rzéka”. Tak karno kajakarzów zajimało sã zbiéranim smiecy z rzéczi Rédë i ji kòrëta, a w tim samim czasu dérowała akcjô czëszczeniô gardu. Delë sã na to mieszkańcë, przedstôwcë samòrządu, Rédzczi Radzëznë Seniorów i Młodzëznowi Ògniarsczi Zdrëszënë. Ò òrdąg w całi akcje starã miała radnô Katarzëna Smòlskô. Wòlontariusze zebrelë czilenôsce miechów smiecy i przëwrócëlë snôżotã rzéce. Pò sprzątanim pòtkelë sã w rédzczim parkù na grillu. Akcjô mô na célu ùprawienié esteticzi i zdrowiô strzodowiszcza, szérzwienié proekòlogicznëch pòstawów i ùmòcniwanié zrzeszë w lokalnëch spòlëznach. Òrganizatorzë zapòwiedzelë, że sprzątanié miasta bãdze rëchtowóné czãscy. Chcą, żebë stało sã to stójnym partã programù bùdowaniô dobrëch pòstawów ù mieszkańców.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie