Wëwiezlë białkã bez pitaniô – bëła niedowinnô

Tësąc szescset kilométrów òd dodomù bëła w sôdzë przez piãc miesący białka falszëwò winowónô ò dëtkòwé szachlarstwa.

Amerikańsczé media òpisywają sprawã falszëwie òbskôrżony Angelë Lipps. Piãcdzesąt lat stôrą białkã szandarzë zatrzimelë łoni w lëpińcu w ji chëczë w stanie Tennessee, a zamknãlë w sôdzë tësąc szescset kilométrów dali w Nordowi Dakòce. Bëła winowónô ò financowé szachlarstwa. Wëpùscëlë jã przed Gòdama, czej doznelë sã, że aresztowónô ni mô nic pòspólnégò ze sprawą. Òkôzało sã, że wskôzôł jã jakno pòdezdrzóną systém rozpòznôwaniô twarzów Clearview AI, wëzwëskiwający algòritmë sztëczny inteligencje. Aplikacjã wëzwëskała pòlicjô w Fargò w Nordowi Dakòce, gdze doszło do przesprawów we łżëkwiece i maju. Tedë jinô białka pòwëcygała dëtczi z bankòmatów na falszëwé pòdôwczi. Sztëcznô inteligencjô przëmierzëła dóné z mònitoringù z ùżiwóną przez niã bazą òdjimków ze spòlëznowëch mediów i za nôbarżi szlachòwną wskôzała białkã z Tenessee, jakô nigdë w żëcym nie bëła w Nordowi Dakòce. Fargòskô pòlicjô przedstawiła ten wskôz sãdzémù, a nen pòdpisôł nôkôz aresztowaniô białczi ë przewiezeniô ji do Nordowi Dakòtë. Szandarzë nie zrobilë z nią ani z ji rodzëzną niżódnëch wëdowiédzów. Bronisze Angelë Lipps a téż firma òdpòwiôdającô za Clearview AI gôdają, że colebądz wskôże sztëcznô inteligencjô, to mùszi ë tak bëc wiedno sprawdzoné przez człowieka i miałobë bëc traktowóné blós jakno pòmòc. Czej w gòdnikù wëszło, że fargòskô pòlicjô zamknãła lëchą personã, szandarzë zażorgelë, żebë niesłëszno winowóny zagwësnic plac w gòscyńcu, a jeden z nich sóm òdwiózł jã dodóm. Tameczny kòmendant David Zybòlsczi, jaczi òd aresztowaniô białczi przeszedł ju na emeriturã, przëznôł, że jegò lëdze za baro zawierzëlë technologie. Kòmenda nie dała òficjalnëch przeprosënów. Angela Lipps jich pòzwała ò wënôdgrodzenié czile miesący spãdzonëch w sôdzë.

H.S.Sz.