Reklama

Za dwa i pół rokù do Serakòjc dojedzemë baną

Klëka

23/09/2025 11:07

Przedstôwcë rządu bëlë bëtny przë pòdpisanim ùgôdënkù na znowienié dzejaniô wôżny dlô Kaszub banowi linie.

W pòniedzôłk dwadzestégò drëdżégò séwnika w Serakòjcach doszło do pòdpisaniô ùgôdënkù Pòlsczich Banowëch Liniów z pòznańską firmą Torpòl ò zaprojektowanié ë wëbùdowanié banowi linie z Kartuz do Lãbòrga przez Serakòjce. Bëlë przë tim bëtny midzë jinszima premiéra Donald Tusk, minister insfrastrukturë Dariusz Klimczôk, wicemarszôłk pòmòrsczégò Wòjewództwa Leszk Bònna a téż przedstôwcë samòrządów. Wedle zapòwiesców banë na ti linie mają jezdzëc ju za dwa i pół rokù, a òkróm dôwnëch pòżdôwków, jaczé òbsłëgiwałë banë na ti linie przed ji zamkniãcym w dwatësącznym rokù, pòwstóną téż nowé w Grzëbnie, Łapalëcach i kòl szkòłë w Serakòjcach. Nôchùtszé banë z Serakòjc zarô do Gduńska dojadą w gòdzënã piãtnôsce minut. Przë òrãdzu ùroczëznë pòdpisaniô ùgôdënkù premiéra gôdôł ò znaczënkù ti linie dlô bùdacje i fùnksnérowaniô atomòwi elektrownie w gminie Chòczewò, a téż wskazéwôł na perspektiwë, jaczé sã òdemkną dlô kaszëbsczi turisticzi ë rozwiju regionu. Scwierdzył, że lokalné inwesticje mùszą jic wëcmanim z planama na bùdacje wiôldżich kòmùnikacjowëch pòrtów i banu wiôldżich chùtkòsców. Marszôłk Mieczësłôw Struk wëdôł òswiôdczenié, w jaczim wskôzôł, co ni mielë richtoscë ti, co wëszczérzelë sã z remòntu banowiszcza w Serakòjcach, czej bana do nich nie dojéżdża, ani ny, co wëwtôrzelë samòrządóm marnowanié dëtków. Inwesticjô znowieniô rësznotë na linie Kartuzë-Serakòjce-Lãbórg bãdze kòształa szescset dwadzesce piãc miliónów złotëch.

H.S.Sz.