Reklama

Zabił psë, bò nie rozmiôł so dac z nima radë

Klëka

25/11/2025 14:31

Doma ù chłopa szandarzë zabezpieczëlë dwie flintë, patrónë i pòzwòlenié na barniã.

W sobòtã dwadzestégò drëdżégò smùtana pòlicjô w Człëchòwie dostała wezwanié nad jedno z jezór w gminie Rzeczenica w człëchòwsczim krézu. Chłop, jaczi prawie jachôł przez las, zmerkôł na gładze wòdë cało psa. Pòlicje rzekł, że jadącë przez ten sóm las dzéń rëchli, miôł widzóné dwa psë, co biegałë lózã. Szandarzë przëjachelë nad jezoro i nalezlë w jezorze téż drëdżégò psa. Weterinôrz scwierdzył, że òba zdżinãłë przez pòstrzelenié z jachtarsczi barnie. Ùdało sã szandaróm nalezc miéwcã tószów – sétmëdzesąt lat stôrégò chłopa ze szczecënecczégò krézu. Sóm zabił swòje psë z flintë. Jak wëwidnił, nie dôwôł so ju radë z òpieką nad nima, tej je zabił a pòtemù jich scyrz szmërgnął do znajomégò jezora. Mòże trafic do sôdzë na trzë lata za jich zabicé w przék ùstawòwi ò òchrónie zwierzãt.

H.S.Sz.