Reklama

Zaczãlë rok mësleniô ò przińdnoce

Klëka

27/11/2025 12:59

Z Kaszëb, Zaczãlë mësleniô przińdnoce - zdjęcie, fotografia

Etnotank chce wezdrzec w przińdnotã Kaszub za dwadzesce piãc lat. Fòrum zrechtowóné w Gduńskù miało kù temù pòsłużëc.

We strzodã dwadzestégò szóstégò smùtana w Instituce Miesczi Kùlturë we Gduńskù bëło pierszé Fòrum Kaszëbi 2050. Wëdarzenié bëło zrëchtowóné w òbrëmim projektu Etnotank. Bëtnicë wësłëchelë przemówieniô przédnika Kaszëbsczégò Institutu profesora Cezarégò Òbracht-Prondzyńsczégò, jaczi gôdôł ò dzysdniowëch wątplëwëch żochach zdrzeniégò na kaszëbską zajmã, jaczim procëmstawił ùdbã regeneratiwny etnicznoscë, òpiarti na òdemkłim i mòdernym zdrzenim z nastawienim na zéwiszcze „Nigdë do zgùbë nie przińdą Kaszëbë”. Pòtemù ùczãstnice pòdzelony na trzë karna wzãlë ùdzél w diskùsjach – gôdkã ò juwernoce, edukacje i kùlturze prowadzëła Éwelina Stefańskô, ò òbëwatelsczich pòstawach Łukôsz Grzãdzëcczi, a ò strzodowiszczu Hanna Òbracht-Prondzyńskô. Pò przerwie ùczãstnicë zmienilë grëpë, żebë dofùlowac wniósczi ë ùdbë. Chòc zaprezentowóné na kùńc wëniczi robòtë bëłë w przédny rédze diagnozą terôczasnotë i pòkriwałë sã z ju znónyma wnióskama, jaczé projekt Etnotank przedstôwiô w swòjich rapòrtach òd trzech lat, to fòrum je le pierszim kraczajã w dłëgszim projekce pierszégò etnicznégò foresightu – próbë wezdrzeniô w przińdnotã przez zrëchtowanié spòlëznowégò zòbrazënowiszcza, to je imaginarium. Przez nôblëższi rok bãdą rëchtowóné strzodowiszczowé debatë i pisóné scenarniczi przińdnotë Kaszëbów i Kaszëb na dwa tësące piãcdzesąti rok. Brzôd ti robòtë mô bëc pòdrechòwóny na drëdżim fòrum, jaczé je pòmëslóné na za rok, téż na smùtan.

H.S.Sz.