Reklama

Załóżca i przédnik Drutexu nie żëje

Klëka

05/12/2025 10:07

Jeden òd nôwikszich robòtodôwôczów na Pòmòrzim ùmarł. Przedstôwcë firmë zapòwiedzelë, że mdą szlë dali z dokazã jegò żëcégò z taczim zaangażowanim, jaczé òn co dzéń pòkazéwôł.

Firma Drutex z Bëtowa dała do wiadë, że we czwiôrtk czwiôrtégò gòdnika ùmarł ji przédnik i załóżca Leszk Gerszewsczi. Béł sétmëdzesąt piãc lat stôri. Firmã ùsadzył w Wiklënie w gminie Redzëkòwò w tësąc dzewiãcset òsmëdzesątim piątim rokù, z zôczątkù pòd pòzwą Wëtwôrzanié Wërobinów Drótu, Lińcuchów i Sprãżënów. Pòtemù przeniósł jã do Bëtowa i zmienił pòzwã na Drutex, a òd tësąc dzewiãcset dzewiãcdzesątégò czwiôrtégò rokù ji produkcjô przestawiła sã na òkna PVC. Ta decyzjô przëniosła dosc tëli zwëskù i òdemkła firmã na swiatowi rënk. Dzysdnia w Drutexu robi kòl sztërë tësące lëdzy, a co dzéń produkùją tam nawet sétmë tësący sztëk òknów, z czegò òsmëdzesąt procent jidze na ekspòrt na całi swiat. Przedstôwcë samòrządzënë, jak starosta bëtowsczégò krézu Leszk Waszkewicz, przëbôczëlë zasłëdżi pòdjimarza dlô regionu przez stwòrzenié placów robòtë i promòcjã Bëtowa na całi swiat. Gerszewsczi prowadzył téż filantropijné dzejanié, a piãc lat nazôd dostôł titel Honorowégò Òbëwatela Bëtowa.

H.S.Sz.

Załączniki