Domôcô wòjna midzë wòjskòwą juntą a partizantama wxyg dérëje, nawetka nimò stolëmny nôtërny katastrofë.
Pò trziseniu zemi, jaczé bëło w piątk dwadzestégò ósmégò strëmiannika, wedle rządowëch przekazów w Mjanmie zdżinãło przez tësąc szescset òsób, a trzë tësące òstało zrenionëch. Znajarze taksëją równak, że lëczba òfiarów mòże sygnąc nawetka dzesãc tësący sztëk lëdzy. Wszëtkò przez ùskòk le dzesãc kilométrów pòd wiéchrzëzną zemi. Trzisenia bëłë w sëmie dwa, ò magnitudze sétmë i sétmë dzesątëch a téż szesc i sétmë dzesątëch stopnia. Mniészé pòrëszenia zemi cygłë sã przez sobòtã i niedzelã. Lëdze pòd zawalonyma bùdinkama, mòstama i drogama żdają na pòmòc, ale jak na terô nôwicy robią òddólno sami mieszkańcë, jaczi próbùją òdgrzebëwac lëdzy spòd grëzlôków chòc i gòłima rãkama. Rządzącô w kraju wòjskòwô junta prowadzy za to biôtkã z partizantama i rebeliantama – ledwie trzë gòdzënë pò trziseniach wòjskò zbómbardowało dotkłi zniszczeniama gard Naùngczo w nordowò-wschódnym parce kraju, zabijającë sétmë òsób, co pòtãpiła Òrganizacjô Zjednónëch Nôrodów. Wódca juntë Min Aùng Hlaing zaczął równak prosëc ò midzënôrodną pòmòc, czegò dotądka przë szlachòwnëch katastrofach mjanmijsczi generôlowie nie robilë. Chinë, Rusjô, Malezjô i Singapùr wësłałë ju do Mjanmë fligrë z retownikama i humanitarną pòmòcą.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie