Ùkrajińsczi prezydent w kôrbiónce z britijsczim gazétnikã zgòdzył sã, że Ùkrajina mùszi rozważac diplomaticzné rozrzeszenié wòjnë z Rusją.
We wtórk 4. gromicznika òpùblikòwónô òstała kôrbiónkã midzë britijsczim gazétnikã Piersã Mòrganã a ùkrajińsczim prezydentã Wòłodimirã Zełeńsczim. Témą bëła wòjna na Ùkrajinie i mòżlëwòta mirnëch ùgôdënków z Ruską Federacją. Zełeńsczi scwierdzył, że czejbë miałabë to bëc jedurnô szansa na mir, sôdłbë do negòcjacjowégò stołu z Władimirã Pùtinã. Pòdsztrichiwôł, że wedle niegò przë taczich negòcjacjach mùszelëbë bëc przedstôwcowie Ùkrajinë, Rusczi, USA a téż Eùropejsczi Ùnie. Przëznôł téż, że nôgwësni jegò krôj stracy part zemiów, jaczé Ruskô zabrała òd inwazje na Ùkrajinã w gromicznikù 2022 rokù. Nôlepszą szansą Ùkrajinë na skùńczenié wòjnë i przińdny bezpiek miałobë równak bëc doparłãczenié do NATO. Òb kôrbiónkã Zełeńsczi pòdôł, że w wòjnie z Ruskama zdżinãło przez 45 tësãcy ùkrajińsczich żôłnérzi, a renionëch òstało 390 tësãcy. Stratë wroga òbtaksowôł na 350 tës. zabitëch i do 700 tës. renionëch.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie