Zeloné Berlëno za piãtnôsce lat

Volksentscheid Baum – tak brzëmi fùlnô pòzwa inicjatiwë niemiecczégò strzodowiszczowégò dzejarza Heinricha Strößenreuthra. Mô przëniesc kómfòrt, gòspòdarczi zwësk i ùprawienié biorozmajitoscë.

Parlament Berlëna przejimnął nowé przepisë, jaczé wëznaczëłë plan do zwënégòwaniô do dwa tësące sztërdzestégò rokù: Na wszëtczich szasëjach niemiecczi stolëcë co piãtnôsce métrów mô stojec drzewò. Dzysdnia rosce tu sztërësta tësący drzéw. I choc sto tësący je do wëcãcô przez chòroscë abò jinszé zagrôżbë, to do pòsadzeniô je sétmëset tësący. Mô to kòsztac trzë miliardë dwasta miliónów eùro, z czegò miliard ju zabezpiecził federalny fùndusz – w tã sëmã wrechòwelë téż dozér nad ju roscącyma bómama. Sadzenié nowëch mô bëc przeprowadzoné na spòdlim lëstë nôlepszich gatënków aktualizowóny co czile lat na spòdlim doswiôdczeniów z wczasniészégò sadzeniô, brëkòwnotów biologiczny rozmajitoscë czë pòdôwków òd alergików. Berlińsczé wëszëznë chcą do inicjatiwë przërôczëc téż samëch mieszkańców, jaczi bãdą mòglë zgłosëc chãc zasadzeniô kònkretnégò gatënkù za gwôsné dëtczi. Gãstosc drzéw kòl szasëjów bãdze zwiksziwónô rôz za razã, żebë mùszebné zjinaczi jak zwãżenia jezdnie i rëmanié parkingòwëch placów nie nastąpiłë w jednym sztóce, co dô mieszkańcóm nałożëc sã do nowégò sztandardu. Rzecznikã jinicjatiwë Baumentscheid je Heinrich Strößenreuther, strzodowiszczowi dzejôrz znóny ju z projektu mającégò ùpòwszednic w Berlënie kòła miast aùtołów, a téż z założeniô òrganizacje GermanZero, jakô za cél stôwiô sobie zrobienié z Niemiecczi kraju klimaticzno neùtralnégò do dwa tësące trzëdzestégò piątégò rokù. Òn wskazéwô na to, że do inicjatiwë Baumentscheid przëparłãczëlë sã pòliticë rozmajitëch partiów. Ùdało sã jich przegadac gòspòdarczima argùmentama – pòsadzenié tëli drzéw mòże zmniészëc strzédną temperaturã w gardze ò dwa gradë, a to wedle badérowaniów mô dac dobri cësk na produktiwnosc w zôkładach robòtë, bò jeden dzéń hëcë to spôdk produktiwnoscë równy pòłowie dnia strajkù. Pòliticë delë sã téż przekònac mieszkańcóm, jaczi w wikszoscë pòperlë pòdjimniãcé. To bë znaczëło, że partiô, jakò bë sã mù sprocëmniła, stracëłabë welmanów.

H.S.Sz.