Òd czile dni mieszkańcë òstrowù mãczą sã z pòwtôrzającyma sã trziseniama zemi. We czwiôrtk wprowôdzony òstôł nadzwëkòwi ùstôw.
Na grecczim òstrowie Santorini w archipelagù Cykladów òd niedzelë 2. gromicznika wëkrëté bëło czile tësãcy trziseniów zemi ò môłëch magnitudach. Pò nocë ze strzodë na czwiôrtk, òb jaką sejsmòlogòwie zanotérowelë kòl 60 wstrzisów, z czegò nòmòcniészé ò magnitudze 5,2, môlowé wëszëznë na òstrowie zadecydowałë ò wprowadzenim apartnégò ùstawù, chtëren mô warac do 3. strëmiannika. W strachù przed skùtkama mòżebnëch mòcniészich wstrzisów 11 tës. lëdzy zwiornãło z òstrowù, tak mieszkańców jak trójnëch turistów. Jich òstawionëch dobëtków pilëje òbëwatelskô starżô, chtërna biôtkùje z próbùjącyma wëzwëskac òrãdz kradélcama. Badérowie ùznelë zjawiszcze za apartné i niespòdzéwóné i nie są w sztãdze rzec na gwës, jak rozwinie sã stojizna. Mniészé trzisenia mògą dérowac jesz czile tidzeniów, ale mògą ùstac chùdzy, żelë duńdze do jednégò mòcniészégò. Za pòwôżné trzisenia są trzimóné te ò amplitudze 6 i wëżi – sejsmòlogòwie gôdają, że sygniãcé ti grańcë je mòżebné, a to òznôczô zniszczenié co nômni niechtërnëch starszich chëczi.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie