Reklama

Zgłoszenié do mieszkaniô rodzëznë prezydenta

Klëka

25/05/2026 16:38

Òdj. https://pl.wikipedia.org/wiki/Karol_Nawrocki#/media/Plik:Karol_Nawrocki_(2025)_(cropped).jpg

W mieszkanim krewnégò Karola Nawrocczégò miôł wëbùchnąc òdżin. Zgłoszenié bëło falszëwé, tak jak jiné szlachòwné w slédnëch dniach.

W sobòtã dwadzestégò trzecégò maja pół ósmi wieczór ògniowô starżô we Gduńskù dosta zgłoszenié ò płonącym mieszkanim, a za piãtnôsce minut ò zatrzimanim krążeniô ù zamkłëch w mieszkanim dzecy. Nie szło sã skòntaktowac ze zgłôszającyma. Służbë dojachałë na plac i weszłë bënë na mòc. Lokal béł pùsti ë nie bëło w nim ògnia. Rafôł Leskewicz, rzecznik Karola Nawrocczégò, pòdôł, że zgłoszenié tikało sã familiowégò dodomù prezydenta. Dodôł, że ju òd czilenôsce dni służbë òdbiérają wezwania do falszëwëch zdarzeniów ò ògniach, bómbach i zagrôżbach zdrowiégò a żëcégò w placach zrzeszonëch z prawiznowima pòlitikama i gazétnikama. Interwencje bëłë midzë jinszima w mieszkaniach przédnégò redaktora Télewizje Repùblika Tomôsza Sakewicza czë przédnika Prawa i Sprawiedlëwòscë Jarosława Kaczińsczégò. Rzeczniczka Ministerstwa Bënowëch Sprôw Karolëna Gałeckô dała do wiadë, że mieszkanié we Gduńskù nie bëło pòd òchroną, bò nie nôleżało do prezydenta, le do nôleżnika jegò rodzëznë. W niedzelã dwadzestégò czwiôrtégò maja premiéra Donôld Tusk zrëchtowôł zetkanié przedstôwców rządu i służbów. Ùgôdelë na nim, że dołożą starë ò nalézenié sprôwców falszëwëch zgłoszeniów, a téż że sprawa ni miałabë bëc pòliticznô.

H.S.Sz.

Źródło i opracowanie własne