Reklama

Zôkôz wëjazdów bez zgòdë wòjska

Klëka

07/04/2026 09:18

Pòzdrzatkòwi òdjimk. Òdj. Thomas Glapa; zdrzódło: de:Bild:Minenjagdboot_Grömitz.JPG

Òbrzészkã zgłôszaniô wëjazdów dłëgszich jak trzë miesące są òbjimniãti wszëtcë dozdrzeniałi chłopi w wiekù do zacëgù.

Z zôczątkã łżëkwiata niemiecczé media, zaczinającë òd gazétë Frankfurter Rundschau, przëbacziwają ò nowim òbrzészkù, jaczi òstôł wprowadzony òd zôczątkù rokù. Kòżdi chłop midzë òsmënôstim a sztërdzestim piątim rokã żëcégò, jaczi chce wëjachac z Niemiecczi na dłëżi jak trzë miesące, mùszi dostac zgòdã òd wòjska. Chòc w stojiznie, czej służba je dobrowólnô, na ùdostanié zgòdë mòże rechòwac machtnô wikszosc chłopów, to mało chtëren jak dotąd złożił taczi wniósk. Wprowadzeniô nowégò prawa spòlëzna ani media prosto ni miałë dotąd zmerkóné. Przez to ny, jaczi wëjachelë w stëcznikù, ni mielë przë tim dbë ò òbrzészkù dostaniô zgòdë, a jesz nie wrócëlë, łómią prawò. W praktice równak ni mają sã czegò bòjec, bò nie są wprowadzoné niżódne sztrôfë za narëszenié ti reglë. Rzecznik Ministerstwa Òbarnë przëkôzôł, że nie je wiedzec kùli wniósków òd zôczątkù rokù trafiło do Bùndeswehrë i przepis w praktice w òglim ni miôł wikszégò znaczeniô. Nie delë téż do wiadë, na jaczi ôrt wòjskò mô wëkrëwac przëtrôfczi łómaniô nowégò prawa.

H.S.Sz.

Źródło i opracowanie własne