Reklama

Zëma zaskòknãła himalajistów

Klëka

07/10/2025 08:33

Aùtór: Luca Galuzzi; zdrzódło: https://pl.wikipedia.org/wiki/Mount_Everest#/media/Plik:Everest_North_Face_toward_Base_Camp_Tibet_Luca_Galuzzi_2006.jpg

W sobòtã wieczór pò tibetańsczi starnie Mount Everestu na pòmòc retowników żdało kòl tësąc himalajistów. Ni mòglë przelezc przez zasëpóné sniegã szlachë.

Òd piątkù trzecégò rujana do Himalajów przëszła krzëkwiô ò niezwëczajny dlô tegò cządu rokù mòcë. Nie zapòwiôdałë ji téż prognozë wiodra. Przez to w sobòtã strzimóné òstało przedôwanié bilietów wstãpù na terenë ùprzëstãpniwóné turistóm w òbéńdze Mount Everestu. Do retownëch służbów trôfiałë pòstãpné wiadła ò karnach himalajistów, jaczich krzëkwiô zaskòknãła i ni mòglë przez niã zlezc do bezpieczny cónë. Retownicë i mieszkańcë górsczich terenów zaczãlë òdsnieżac zasëpóné smiotama stegnë. Nôleżnicë karnów ùsadzonëch pò tibetańsczi starnie nôwëższi górë swiata są jesz sprowôdzóny do môlëznë Qudang, gdze dostóną wszelejaką brëkòwną pòmòc. W sobòtã czwiôrtégò rujana wieczór wedle chińsczich mediów na pòmòc na górsczich szlachach żdało wnetka tësąc wanożników. Pò prowadzony przez całą niedzelã retowny akcje w pòniedzôłk reno jesz dwasta lëdzy żdało na ewakùacjã.

H.S.Sz.

Aktualizacja: 07/10/2025 08:41