Reklama

Zëmòwé òlimpijsczé miónczi òficjalno òdemkłé

Klëka

08/02/2026 10:46

Ze swiata, Zëmòwé òlimpijsczé miónczi òficjalno òdemkłé - zdjęcie, fotografia

Gòspòdarzama latosy òlimpiadë są Mediolan i Cortina d'Ampezzo, a spòrtówcë bãdą dokazewac swòjich spòsobnosców téż w Predazzo i Livigno.

W Italsce w piątk szóstégò gromicznika zaczãłë sã zëmòwé òlimpijsczé miónczi. Przédnô ceremòniô òdemkniãcô bëła na sztadionie San Siro w Mediolanie, gardze-òrganizatorze. Drëdżim òrganizatorã je Cortina d'Ampezzo, gdze téż bëła zrëchtowónô z ti leżnoscë ùroczëzna. Na San Siro òrganizatorzë zabédowelë bòkadną artisticzną programã. Béł w ni trój narzeszeniów do italsczi historie a kùlturë. Wcygniãcé italsczi fanë na maszt razã z òdspiéwanim himnu bëło w tim samim czasu w Mediolanie i Cortinie d'Ampezzo. Tak samò spòrtówcë z rozmajitëch krajów przeszlë w tim samim czasu w sztërzech paradach zanôleżno òd miasta, w jaczim bãdą westãpòwelë. Òkróm gardów-òrganizatorów są to téż Predazzo i Livigno. Westrzód pòlsczi reprezentacje bëła szrëcownica Stoczniówca Gduńsk Kamila Sellier, a téż bòbslejistczi Flotë Gdiniô Linda Weiszewsczi ë Klaùdiô Adamk. W sëmie na latosëch rozegrach pòkôżą sã reprezentacje dzewiãcdzesąt dwùch krajów, a téż kadra indiwidualnëch neùtralnëch atlétów z Rusczi ë Biôłorusczi. W Mediolanie z przemówieniama òdmikającyma miónczi wëstąpilë prowadniczka Midzënôrodnégò Òlimpijsczégò Kòmitetu Kristy Coventry, szef òrganizacjowégò kòmitetu Giovanni Malago i prezydent Italsczi Sergio Mattarella. Pò jich przemówieniach słôwną ariã „Nessun dorma” zaspiéwôł Andrea Bocelli, a tej równoczasno w Mediolanie i Cortinie przeszłë slédné etapë òlimpijsczi sztafetë. Òba płomienie rozłisnãłë jednym sztërkù. W przërëchtowanim widzawiszcza ùdzél wzãło kòl tësąc trzësta òsób, z czegò wikszosc to òchòtnicë z dwadzesce sétmë krajów.

H.S.Sz.

Źródło i opracowanie własne Aktualizacja: 08/02/2026 13:10