Gòsce na żukòwsczim jôrmarkù przed Gòdama mòglë ùzdrzec nadzwëkòwą prezentacjã historie żukòwsczich zôkònniców. Ùżëtô bëła do tegò technologiô trzëwemiarowégò mappingù na ekranie LED.
W sobòtã 7. gòdnika, w sódmi dzéń Gòdowégò Jôrmarkù w Żukòwie, béł pòkôzk promòcjowëch i edukacjowëch materiałów wëzwëskiwającëch mòderné technologie. W òbrëmim projektu „Interaktiwnô spôdkòwizna Żukòwa – ùszłota i przińdnota” òrganizowónégò przez Òstrzódk Kùlturë i Spòrtu w Żukòwie ùczãstnicë jôrmarkù mielë leżnosc òbezdrzec na wiôldżim ekranie LED nad żukòwsczim stawã prezentacjã ò historie gardu, òsoblëwie ò zôkònie i klôsztorze norbertanków. Prezentacjô bëła z ùżëcym techniczi mappingù 3D. Béł téż wëstôwk VR przedwòjnowëch òdjimków gardu.
Żukòwsczi ÒKiS miôł ju zrëchtowóné przódë taczé projektë jak òdtwòrzenié klôsztoru norbertanków w 3D abò interaktiwny prowadnik po Żukòwie. Pòdjimniãcé pòkôzóné w tã sobòtã dostało dotacjã z Eùropejsczi Ùnie w sëmie 92 992,56 zł. Zôsny pòkôzk projektu béł téż w niedzelã 8. gòdnika – w slédny dzéń Gòdowégò Jôrmarkù.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie