Ùczãstnicë hindusczégò swiãta nie dôwelë bôczeniô na niedôwné dobranié wòdë w rzékach.
We wtórk i strzodã na hindusczim swiãce Dżiwitpùtrika w indijsczim stanie Bihar doszło do serie ùtopieniów. Zdżinãło co nômni 36 dzecy i 7 białków. To swiãto je na wdôr òfiarë miticznégò króla Dżimùtwahanë dlô ùretaniô żëcégò dzeckù białczi, chtërna miała je pòswiãcëc bògù Garudze. Zwëczi zrzeszoné z tim religiowim wëdarzenim fejrowónym w nordowëch Indiach a téż w Nepalu òbjimają pòst i mòdlëtwë matków za zdrowié jich dzecy, a téż ritualné kąpanié w rzékach. Ten drëdżi òbrząd òkôzôł sã bëc tragedny w skùtkach – fejrëjący swiãto nie delë bôczeniô na nad miarã wësoką rówiznã wòdë, chcącë zgòdą z tradicją ùczestnic swiãtny dzéń. Wëszëznë stanu przekôzałë, że rodzëznë i krewny òfiarów dostóną szkòdowania.
Szlachòwné wëpôdczi są czãsté na hindusczich swiãtach, ga gãsté rzmë lëdztwa zbiérają sã w jeden plac, a wëmùszenié trzimaniô sã sztandardów bezpiekù je prakticzno nimòżebné. W niejednëch hindusczich tradicjach smierc òb czas religiowëch òbrzãdów mô zagwësnic błogòsławieństwò w pòstãpnym żëcym pò reinkarnacje.
HSz
Twoje zdanie jest ważne jednak nie może ranić innych osób lub grup.
Komentarze opinie