Arcëbiskùp rëchtowôł pùcz w Armenie

Arcëbiskùp Tawùsza Bagrat Galstanian béł wódcą òpòzycjowi fòrmacje Swiãtô Biôtka. Jegò przëstojnicë zacyglë do pùczu przeszło tësąc lëdzy.

Premiéra Armenie Nikòl Paszinian dôł do wiadë, że we strzodã dwadzestégò piątégò czerwińca służbóm bezpiekù państwa ùdało sã nie dopùscëc do przeprowadzeniô pùczu. Armeńsczi Pòdszukòwny Kòmitet pòdôł, że za jegò òrganizacją stojała Swiãtô Biôtka, fòrmacjô pòd prowadnictwã arcëbiskùpa Apòsztolsczi Òrmiańsczi Cerkwie i wódcë procëmrządowëch protestów z łońsczégò rokù Bagrata Galstaniana. Sztrid midzë Cerkwią a rządã zaczął sã w dwa tësące dwadzestim rokù pò militarnym przerżniãcym Armenie w wòjnie z Azerbejdżanã ò Górsczi Karabach i zawiarcym niezwëskòwnégò dlô Armenie miru za rządów Nikòla Pasziniana. Katolikòs Òrmión Karekin II wniósł tedë ò ùstąpienié premiérë z ùrzãdu, na co ten pòtemù òdpòwiôdôł òbwinianim katolikòsa ò łómanié celibatu i ùkriwanié przed wiérnyma jistnieniô swòji córczi. Łoni rëgnãłë protestë pòd prowadnictwã arcëbiskùpa Galstaniana, chtëren dzejającë niezanôleżno òd katolikòsa ë jinszich cerczewnëch strukturów ùsadzył rësznotã direktno zgrôwającą do òbaleniô wëszëznów. We wtórk dwadzestégò czwiôrtégò czerwińca służbë miałë trafic na dokùmentë z dokładnym planã pùczu, òbjimającym kòl tësąc ùczãstników, z czegò wikszosc to szandarzë i wòjskòwi. Pòstãpnégò dnia na nagranim z aresztowaniô Galstaniana, ten krzikôł: „Słëchi ùwôżno, złi, bò colebądz të zrobisz, òstało cë baro mało czasu. Pòżdżë le, më ju pò cebie jidzemë!”. Òkróm niegò strzód zatrzimónëch nalezlë sã téż ùszłi prezydentowie Róbert Kòcharian i Serj Sargisjan. Zarekwirowónô òstała téż jesz niepòdónô do pùbliczny wiadë wielëna barnie i wëbùchòwëch ladënkôw.

H.S.Sz.