Reklama

Arcybiskùp Wòjda przestrzégô przed pòlskòkatolëkama

Klëka

23/07/2026 21:26

Òdj. Joanna Adamik - https://www.flickr.com/photos/archidiecezjakrakow/42924028372/in/photostream/; zdrzódło: https://pl.wikipedia.org/wiki/Tadeusz_Wojda#/media/Plik:Tadeusz_Wojda_(2018).jpg

Geszeftmani bédowelë zdënk czë pògrzéb z ùdzélã kapłana. Tacëlë równak przed klijentama, że to dëchòwny jinszégò wëznaniô.

Arcybiskùp Tadeùsz Wòjda wëdôł òstrzégã dlô wiérnëch gduńsczi archidiecezje. Do kùrie dochôdają zgłoszenia ò niewôżnëch żéńbach i niegódnym sprawòwanim sakramentaliów. Nôczãscy tikô to sã przëtrôfków, czej rodzëznë brëkùją ùsłëgów pògrzebòwëch zôkładów a wieselnëch dodomów i decydëją sã na òfertã ceremónie z ùdzélã kapłana. Miéwcë tëch geszeftów czãsto pòdjimelë równak wespółrobòtã z ksãdzama pòlskòkatolëcczégò kòscoła. Je to apartny wëznaniowi związk stôrokatolëcczi tradicje, bez łączbë z Apòsztolską Stolëcą, nieùznôwający papieża czë celibatu dlô ksãżi, ale trzimający liturgiã szlachòwną do katolëcczi.
Miéwcë pògrzebòwëch zôkładów i wieselnëch dodomów mielë nie wëprowadzac swòjich klijentów z błãdu, a òni sami dopiérze w swòjich parafiach doznôwelë sã, że òstelë òcëganiony. Wedle arcybiskùpa Wòjdë prakticzi geszeftmanów miałë na célu leno zwikszenié zwëskù z ceremóniów. Hierarcha przëbôcził téż, że jeżlë wiérny dôwają swòje dzecë chrzcëc pòlskòkatolëcczémù kapłanowi, to prôwdac chrzest je ùznóny za wôżny, ale dzeckò je tedë fòrmalno włączoné do cëzégò kòscoła. Żebë dopùscëc taczé dzeckò nazôd do sakramentów ùdzélónëch przez katolëcczich kapłanów, nót dodôwkòwëch procedurów. Arcybiskùp prosy, żebë wiérny w sprawie ùdzélu kapłana w ceremóniach w pierszi rédze pitelë sã w swòjich gwôsnëch parafiach i òpasowelë na zletczenia bédowóné przez geszeftmanów.

H.S.Sz.

Źródło i opracowanie własne