Dokùmentacjô za 50 mln złotëch rëchtowónô przez Multiconsult Polska i Transprojekt Gdański pòzwòli na zaczãcé robòtów, chtërne wrócą banową rësznotã na wëłączoné linie na Nordze.
Pòlsczé Banowé Linie pòdałë do wiadë, że w 2025 rokù òstóną ògłoszoné pierszé ùtrôpë na mòdernizacjã linie nr 230 midzë Wejrowã a Chòczewã, a téż na bùdacjã nowi z Chòczewa do sparłãczeniô z linią nr 229 kòl Steknicë, jidącą przez nową atomòwą elektrowniã, chtërna mô stanąc w gminie Chòczewò. Liniô nr 229 mô bëc téż òdnowionô na dzélëkù Lãbórg – Łeba, gdze dzysdnia cudżi jeżdżą leno òb lato. Inwesticjô zakłôdô pòstawienié nowëch przëstanków, remònt stòrëch a téż znowienié banowi rësznotë, jakô w tim parce Kaszëb je dzysdnia mòckò ògrańczonô.
W przërëchtowanim są dokùmentë dlô projektu. W związkù z planama do Regionalny Direkcje Òchronë Strzodowiszcza òstałë złożoné 3 wniósczi ò ùdostanié decyzje co do dopùszczeniô do robòtów z pòzdrzatkù na dobro strzodowiszcza. Part inwesticje zakłôdający mòdernizacjã dzélëka Lãbórg – Łeba ju dostôł zgòdã. Tegò téż partu żelôznëch dargów mdze sã tikôł pierszi z zapòwiedzónëch ùtrôpów. Wedle planów na òdnowionëch liniach towarowé banë pòjadą z chùtkòscą 120 km/h, a pasażérsczé – nawet do 160 km/h. Kùńc bùdowów je òbrechòwóny na 2029 rok.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie