Gmina Nowô Karczma dała sã na òdbùdowã zabëtkòwëch ògrodzeniów z kamienia na sztërzech smãtarzach.
W gminie Nowô Karczma dérëje projekt pòd pòzwą „Renowacje z òdbùdową kamiannëch ògrodzeniów zabëtkòwëch smãtarzów na terenie gminë Nowô Karczma”. Òdnowieniémù słëchają smãtarze w Stôrim Barkòczënie, gdze wëkònôwca ju kùńczi robòtã, a téż w Szpònie, Stôrim Grabówkù i Królewsczim Szumlésu. Wójt gminë Andrzéj Pòllôk dôł do wiadë, że òsoblëwé bôczenié mô bëc dóné na przédné partë ògrodzeniów, z wëszawą sto centimétrów òd zemi i szerzawą òsmëdzesąt centimétrów, dzãka czemù mùrczi bãdą stojałë mòcno i wëzdrzałë aùtenticzno. Dodôwkòwò kòl kòżdégò ze smãtarzów mô bëc pòstawionô infòrmacjowô tôfla ò zabëtkòwëch wôrtnotach môlu. Całô inwesticjô kòształa piãcset szescdzesąt tësący złotëch. Sztërësta sétmëdzesąt pòchôdô z Rządowégò Programù Òdbùdowë Zabëtków, a négã gmina dołożëła z gwôsnëch dëtków.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie