Na òrganizowónëch przez Karno Sztudérów „Pòmòraniô” Kònkùrsach Wiédzë ò Pòmòrzim młodi lëdze mają leżnosc baro ùłatwic so rozwij swòjégò kaszëbsczégò zapôlënkù.
W sobòtã 5. rujana w bùdinkù Historicznégò Wëdzélu Gduńsczégò Ùniwersytetu kaszëbsczé Karno Sztudérów „Pòmòraniô”, jaczé dzejô kòl Kaszëbskò-Pòmòrsczégò Zrzeszeniégò, zòrganizowało II etap i finał XXXVI Kònkùrsu Wiédzë ò Pòmòrzim, w jaczim ùczãstnicë ze strzédnëch szkòłów spróbòwelë sã z pitaniama ò kaszëbską i pòmòrską lëteraturã, historiã, geògrafiã czë rozmajité wietwie kùlturë. W finałowim jury bëlë dr Michôł Kargùl, dr Grégór Schramke, dr Katarzëna Jereczk-Kòrzeniewskô i dr Tomôsz Fópka.
Pò drãdżim pòkôzkù swòji wiédzë ò regionie pierszi plac dobéł Francëszk Wandtke z Krézowégò Karna Szkòłów nr 1 w Rëmie. Négã pòdium zajãlë przedstôwcë I Òglowòsztôłcącégò Liceùm m. J. Wëbicczégò w Kòscérznie: Aniela Makùrôt (II plac) i Paùel Gańsczi (III plac). Dobiwcë trzech pierszich placów òkróm jinëch nôdgrodów dostelë téż indeksë na kaszëbską etnofilologiã na Gduńsczim Ùniwersytece.
Winszëjemë dobiwcóm, a za òrganizacjã i wszelejaką robòtã wkół kònkùrsu dzãkùjemë Karnu Sztudérów „Pòmòraniô” i juroróm.
HSz
Twoje zdanie jest ważne jednak nie może ranić innych osób lub grup.
Komentarze opinie