Reklama

Dogôdënk pòdpisóny. Przińdnota Pòmòrzégò zrzeszonô z baną

Klëka

22/10/2024 11:55

Nowò przëjãti Banowi Pakt dlô Pòmòrzégò mô zagwësnic realizacjã planów zmòcniwającëch atrakcyjnotã rézów baną w najim wòjewództwie. Na Pòmòrzim je nôwëższi w Pòlsce wskôzywôcz wëzwëskaniô cugów.

W pòniedzôłk 21. rujana we Gduńskù na pòtkanim znajarzów òd banë z ùrzãdnikama i samòrządówcama òbgôdónô òstała przińdnota pòmòrsczégò wòjewództwa w òbjimie rozwiju zbiérny kòmùnikacje.

Ministerstwò Infrasztrukturë, Pòlsczé Banowé Linie i Pòlskô Państwòwô Bana pòdpisałë z wëszëznama wòjewództwa dokùment ò mòżebnym historicznym znaczënkù, pòzwóny Banowim Paktã dlô Pòmòrzégò. Je to pierszi tak szerok céchùjący planë rozwiju banowëch liniów dokùment w Pòlsce, jaczi òstôł pòdpisóny przë ùdzélu samòrządu. Zjiszczenié planów zadeklarowónëch w Pakce je nôdzeją bëlnëch zmianów w sprawie tôklu kòmùnikacjowégò wëłączeniégò dlô niechtërnëch partów Kaszub.

Dokùment zapòwiôdô ùrësznienie przewòzów na linie Lëpùsz – Bëtowò – Kòrzëbié pò zakùńczenim robòtów na linie 201 do Kòscérznë, ùrësznienié przewòzów na linie Kartuzë – Serakòjce – Lãbórg do 2027 rokù, zakùńczenié robòtów na linie Réda – Wiôlgô Wies do 2028, a téż przekôzanié Chùtczi Gardowi Banë pòd zarząd trzëgardowégò samòrządu. W całim wòjewództwie mô bëc téż pòspólné sztëmòwanié prizów za przejazdë przez krézë i gminë, co mô zaczic dzejac òd 2026 rokù. Wszëtczé planë przëjãtégò paktu òbjimają 150 km banowëch liniów i inwesticje za 1,5 mld złotëch.

H.S.Sz.