Wedle badérôw dzëczi najadłë sã farwòwónégò strzódka na mëszë i wieszczówczi.
W strëmiannikù w Kalifòrnie w grôfstwie Mònterey jachtarze ùjachtowelë czile dzëków, jaczé miałë mòdré miãso. Zgłôszającë to do służbów i mediów jeden z jachtarzów pòdczorchiwôł, że nie jidze ò letczé zafarwienié, le ò néònową mòdrosc, szlachòwną téż za farwą jagòdów, co pòcwierdzëłë òdjimczi. Òd tegò czasu w nym òkòlim jesz czile razy nalôżelë dzëczi ò mòdrim miãsu, a labòratoriowé testë zleconé przez Kalifòrnijsczi Departament Rëbaczeniô i Dzëwi Rodë dokôzałë, że w miãsu dzëków nalòzł sã chemiczny strzódk wëzwëskiwóny do ògrańcziwaniô pòpùlacjów wieszczówków i pólnëch mëszów, jaczé szkòdzą ùprôwóm. Zabijający je difacynón przenôszô sã téż pò zjedzenim jich miãsa przez jinszé zwierzãta, sprôwiającë midzë jinszima reka, bezplennosc i rozmajité chòroscë, dlôte téż òd łońsczégò rokù na jegò brëkòwanié w Kalifòrnie òstałë nałożoné wiôldżé òbòstrzenia. Z badérowaniôw miãsa wëchôdô równak, że dzëczi mùszałë nalezc jaczis métel na dostanié sã do manidła z trëcëzną, jaczé teòreticzno bëło zabezpieczoné przed wikszima zwierzãtama. Mòdrô farwa jich miãsa pòchôdała z farwnika, jaczim difacynón je farwòwóny dlô òstrzédżi. Lokalné służbë òchrónë rodë prosëłë, żebë zgłaszac do nich wszelajczé przëtrôfczi dzywno mòdrëch zwierzãt.
H.S.Sz.
Twoje zdanie jest ważne jednak nie może ranić innych osób lub grup.
![Co? Dze? Czedë? [30.06-6.07]](https://cdn.cmc-gallery.pl/static/files/gallery/590/thumb__1699237_1751271124.webp)
Komentarze opinie