W òbrëmim Gduńsczich Kaszëbsczich Dni na Gduńsczim Ùniwersytece zrëchtowónô bëła ùroczëzna ùpamiãtniwającô pòwstanié czerënkù, jaczi ju òd dzesãc lat sztôłcy nowëch kaszëbistów.
We strzodã òsmënôstégò czerwińca w bùdinkù historicznégò wëdzélu Gduńsczégò Ùniwersytetu bëła ùroczëzna z leżnoscë dzesąti roczëznë ùsadzeniô czerënkù kaszëbsczi etnofilologie. W rozegracje wzãlë ùdzél wëkłôdowcë i nôleżnicë programòwi radzëznë czerënkù, sztudérzë, przedstôwiający swòje òsygniãca absolwencë, bùtnowi interesariusze z Mùzeùm Kaszëbskò-Pòmòrsczi Pismieniznë i Mùzyczi a téż Kaszëbskò-Pòmòrsczégò Zrzeszeniégò, przedstôwcë wëszëznów ùczbòwnie i wòjewództwa, kaszëbsczégò parlamentarnégò kòła, a téż wiele drëchów i sympatików kaszëbsczi etnofilologie. Przemôwiający na zetkanim przëbôczëlë historiã nié blós samégò czerënkù, ale téż rëchlészich pòdjimniãców òkòma kaszëbiznë na Gduńsczim Ùniwersytece. Wiele razy mòcno pòdsztrichniãté bëłë téż zasłëdżi doktór Justinë Pòmiersczi jakno òpiekùnczi czerënkù. Òd przedstôwców kaszëbsczégò parlamentarnégò na ji rãce złożony òstôł strzébrny medal senatu, a razã z Lucyną Radzymińską dostała téż bronzowi medal Gduńsczégò Ùniwersytetu. Ùroczëznã òbònił kaszëbskòjãzëkòwi wëstãp Kapelë z Marszu z wòkalã sztudérczi kaszëbsczi etnofilologie Móniczi Jakùbk. Krótkò pò ùroczëznie niedalek, bò w ksążnicë na Wëdzélu Spòlëznowëch Nôùków, bëła debata w òbrëmim projektu Etnotank rëchtowónégò przez Kaszëbsczi Institut na témã „Jak ùczëc ò Kaszëbach”. Bëtnicë diskùsje rozwôżelë jaczé wëzwania stoją przed kaszëbsczima szkólnyma i edukatorama jinszégò ôrtu, a téż co słëchałobë pòdjic, żebë wiédzô ò Kaszëbach, rozkòscérzanié kaszëbsczi swiądë i juwernotë a téż znajomòtë kaszëbiznë wëzdrzałë lepi jak dzysdnia.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie