Reklama

Ekskòmùnika dlô lefebristów

Klëka

03/07/2026 09:07

Abp. M. Lefebvre. Òdj. Jim, the Photographer; zdrzódło: https://pl.wikipedia.org/wiki/Marcel_Lefebvre#/media/Plik:Portrait_of_Archbishop_Marcel_Lefebvre.jpg

Nôleżnicë i przëstojnicë Kapłańsczégò Bractwa Swiãtégò Piusa Dzesątégò òstelë wëłączony z Katolëcczégò Kòscoła.

We strzodã pierszégò lëpińca w Écône w Szwajcarsce biskùpi tradicjonalisticznégò Kapłańsczégò Bractwa Swiãtégò Piusa Dzesątégò Alfonso de Galarreta i Bernard Fellay dokònelë kònsekracje sztërzech nowëch biskùpów nôleżącëch do bractwa: Pascala Schreibera, Michaela Gòldade, Michela Poinsinet de Sivry ë Marca Hanappiera. Bractwò założoné w tësąc dzewiãcset sétmëdzesątim rokù przez frãcësczégò arcëbiskùpa Marcela Lefebvre'a sprocëmniwô sã liturgicznym refòrmóm Drëdżégò Watikańsczégò Sobòru i winëje Apòsztolską Stolëcã ò pòddôwanié sã mòdernizmòwi. Kònsekracjô bëła przeprowadzonô bez zwëczajno wëmôgóny zgòdë Apòsztolsczi Stolëcë, nimò òstrzégów przed kanonicznyma skùtkama taczégò aktu. Papiéż Léón dwa dni przed kònsekracją słôł lëst do generalnégò pòdwëższégò bractwa, Davide Pagliaraniégò, z prosbą ò òdstąpienié òd ceremónie. Nimò to biskùpi jã przeprowadzëlë. Dikasteriô Nôùczi Wiarë ùznała to za dzejanié ò schizmaticczi nôtërze i dwadzesce sztërë gòdzënë pò ceremónie wëdała ògłos ekskòmùniczi. Òbjimniãti nią są nié leno kònsekrowóny i kònsekrëjący biskùpi, ale téż wszëtcë kapłani ë wiérny, jaczi fòrmalno przënôlégają do Kapłańsczégò Bractwa Swiãtégò Piusa Dzesątégò. Fòrmalnô przënôleżnosc òznôczô tu bënowé a bùtnowé pòdzélanié dëcha schizmë przez przëstôwanié do lefebristów, zgôdzanié sã z nima ë deklarowanié swòjégò dlô nich pòpiarcô. Sakramentë ùdzélóné przez kapłanów Bractwa są òdtąd ùznôwóné za niegódno sprawòwóné, a ùdzélóny przez nich sakrament pòkùtë i sakrament żéńbë, przë jaczim asystëją, są ùznôwóné za niewôżné.

H.S.Sz.

Źródło i opracowanie własne