Na pòtkanim w Eùropejsczim Centrum Solidarnoscë przédną témą béł bezpiek Pòlsczi i Eùropë wedle zagrôżbë nielegalny imigracje i hibridowi wòjnë prowadzony przez wschòdnëch sąsadów.
We czwiôrtk i piątk (szósti-sódmi gromicznika) we Gduńskù dało ùzdrzec wicy szandarów na szasëjach jak zwëczajno. Zmòcnioné sztandardë bezpiekù to béł mùsz, kò w tëch dniach w kaszëbsczi stolëcë gòscëlë kòmisarze Eùropejsczi Kòmisje, jaczich przëjął premiéra Pòlsczi Donald Tusk. Bëlë witóny téż przez prezydentkã Gduńska Aleksandrã Dulkewicz i ùszłégò prezydenta Lecha Wałãsã. Òdwiôdënë miałë związk z òbjimniãcym przez Pòlskã półrocznégò przédnictwa w Radzëznie Eùropejsczi Ùnie. Nôwôżniészé òb tã wizytã bëło zetkanié pòlsczi Radzëznë Ministrów z ùniowima kòmisarzama w piątk w Eùropejsczim Centrum Solidarnoscë. Pò òbgôdkach na pòspólny kònferencje przemówielë Donald Tusk i przédniczka Eùropejsczi Kòmisje Ursula von der Leyen. Premiéra gôdôł ò brëkòwnocë zagwësnieniô Eùropie bezpiekù. Zapòwiedzôł, że Pòlskô nie bãdze wprowôdzała w żëcé pòstanowieniów Migracjowégò Paktu z pòzdrzatkù na apartną stojiznã państwa, jaczé przëjãło ju kòl dwa miliónë ùchódników z Ùkrajinë. Zapòwiedzôł depòrtacje cëzyńców, chtërny bãdą na brutalny ôrt łómelë pòlsczé prawò. Ursula von der Leyen mówiła ò zwikszenim pòspólnégò finansowaniô dlô òbarnë i reakcje na zagrôżbë hibridowi wòjnë prowadzony przez Rusjã i Biôłoruskã z ùżëcym szmùglowników i hańdlarzów lëdzama. Òkróm sprôw bezpiekù Ùnie przed bùtnowima zagrôżbama na kònferencje bëło téż gôdóné ò zelżenim ùdbów Zelonégò Miru a ùdbach na òbniżenié prizów za energiã.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie