Gmina Żukòwò òdpiérô òbwinë, jaczé bëłë pòdniosłé pò kòntrowersjowim pòtkanim z bùtenrządowima òrganizacjama.
Ùrząd Gminë Żukòwò pòdôł w mediach kòmùnikat ò pòtkanim z przedstôwcama bùtenrządowëch òrganizacjów, jaczé bëło zòrganizowóné we wtórk czwiôrtégò gromicznika. Kòntrowersjowô òkôzała sã infòrmacjô, że bëło to pierszé taczé pòtkanié w całi historie gminë, a ùszłi bùrméster Wòjcech Kankòwsczi prakticzno nie wespółrobił z bùtenrządowcama. Timczasã pòtkania bùtenrządowëch òrganizacjów z wëszëznama gminë zdarzałë sã ju przódë, téż za kadencje bùrméstra Kankòwsczégò. Referat spòlëznowi kòmùnikacje Ùrzãdu Gminë bróni sã przed òbwinama ò falszëwą propagandã – chòdzëc miało ò to, że bëło to pierszé pòtkanié „na taczi ôrt”, a na przińdnotã kòmùnikatë ùrzãdu bãdą dokładniészé. Przedstôwcowie òrganizacjów dzejającëch w gminie òbskôrżają włôdze téż ò lëché infòrmòwanié ò swòjich pòdjimniãcach, bò wiele òrganizacjów nie dostało rôczbë na pòtkanié, a dowiedzec sã szło ò nim leno w spòlëznowëch mediach. Ùrząd temù przékùje i òdpòwiôdô, że rôczbë bëłë rozséłóné w wicy jak 200 mailach. Wątplëwòtë bëłë téż co do przërôczeniô na pòtkanié Mariusza Seraczkewicza, jaczi bùtenrządowé dzejanié prowadzy w Trzëgardze, a nié w gminie Żukòwò, znóny je równak z pùblikacjów propagùjącëch dzejanié dzysdniowi bùrmésterczi Mariolë Zmùdzyńsczi i atakòwanié radnëch òpòzycje. Zmùdzyńskô zaprzékòwała òbskôrżenióm ò pòdpłôcanié Seraczkewicza z gminnëch dëtków, a na pòtkanié òstôł przëroczony z pòzdrzatkù na swòje doswiôdczenié w sektorze.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie