W sëmie szestnôsce fòlkloristicznëch karnów z Kaszub i ze swiata wëstąpi na latosym Midzënôrodnym Festiwalu Fòlkloru wew Brusach i w òkòlim.
Brusë, Czersk, Kòscérzna, Wdzydze i Wielé to gòspòdarze latosy edicje Midzënôrodnégò Festiwalu Fòlkloru. Zjachałë sã na nien fòlkloristiczné karna z Kaszub i swiata: Rodné karna to „Kaszëbë” z Wielô i Kôrsëna, „Krëbanë” zez Brus, „Kòscérzna” z Kòscérznë, „Kaszëbsczé Nótë” z Nowégò Klincza, „Zemia Czerskô” z Czerska, „Maceszczi” z Wielô, „Kaszëbë” z Chòniców, „Bławatczi” z Chòniców i „Mòdrôczi” z Pelplëna, a karna zeza grańcë pòchôdają z Tërecczi, Rumùnie, Słowacczi, Zjednónëch Stanów, Nordowi Macedonie, Gwineji i Kòlumbie. Wszëtczé te karna pòtkałë sã ju we wtórk dwadzestégò drëdżégò lëpińca na integracjowim wieczórkù, a òd strzodë dwadzestégò trzecégò do niedzelë dwadzestégò sódmégò lëpińca jich wëstãpë bãdze szło òbzerac na binach w gardach gòszczącëch festiwal. We strzodã karna przemaszerëją przez Wielé. W piątk wew Brusach w òbrëmim „Mùzykòbraniô” wëstąpią téż wëkònôwcë jinszich zortów mùzyczi, a w sobòtã na parkingù kòl spòdleczny szkòłë bãdze Zôbòrsczi Jôrmark. W slédnym dniu festiwalu w niedzelã wszëtczé karna wezną ùdzél w swiãti mszë i przemarszu szasëjama Brus. Na finałowim kòncerce z kaszëbsczim tuńcã i piesnią w swòjich gwôsnëch jãzëkach zaprezentérëją sã téż karna z bùtna. Drobnotë, jak place i gòdzënë wëstąpieniów wëkònôwców, do nalézeniô na plakatach.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie