Bùdacjô amfiteatru na placu dôwnëch miesczich basenów mògłabë bëc baro zwëskòwnô dlô rozwiju kùlturë w Lãbòrgù, twòrzącë wikszé mòżlëwòscë jak te, jaczé zagwësniwô dzysdnia bùdink Fregatë.
Miesczi Ùrząd w Lãbòrgù mù ùdbã na nowi òbiekt na môlu dôwnëch miesczich basenów przë szasëje Ósmégò Maja. Miôłbë tam pòwstac amfitéater z biną i zdrzadnią na kòl dwa tësące òbzérôczów, a téż towarzącé mù òbiektë, midzë jinszima park do rekreacje czë sanitarné zapleczé. Pòwstanié amfitéatru òdcążëłobë bùdink Lãbòrsczégò Centrum Kùlturë Fregata jeżlë chòdzy ò òrganizacjã kùlturalnëch wëdarzeniów – tam je plac blós na dwasta piãcdzesąt òbzérôczów i felëje szatniów a wichódków dlô aktorów abò mùzycznëch karnów, przez co prakticzno nie dô sã tam òrganizowac wikszich wëdarzeniów. Nowô bina ze zdrzadnią mają bëc bëlnym placã na kòncertë, przedstôwczi, wieczórczi mùzyczné a pòeticczé, zajmë i warkòwnie czë kònferencje. Decyzjô ò bùdacje kómpleksu wkòl amfiteatru równak je ùzanôleżnionô òd tegò, czë gardowi ùdô sã dostac ùdëtkòwienié na ten cél, òbtaksowóny na dwadzesce miliónów złotëch. Òsmëdzesąt piãc procent gard mòże dostac z Pòlskò-Szwajcarsczi Programë Rozwiju Gardów. Lãbórg zgłosył do programë projekt pòd titlã „Impùls do zjinaków – aktiwny, bezpieczny a ekòlogiczny Lãbórg” i ju nalôzł sã na piãcdzesątim ósmim placu òd sto dzewiãtnôsce gardów, co złożëłë wniósczi. Ùrząd bãdze mùszôł jesz przedstawic całowny bédënk projektu, a tedë kòmisjô òbtaksëje, czë Lãbórg dostónie dëtczi na nowi amfitéater.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie