Reklama

Kąpielowi strój béł lëchi – zakriwôł za wiele

Klëka

11/07/2026 14:29

Òdj. Giorgio Montersino from Milan; zdrzódło: https://pl.wikipedia.org/wiki/Burkini#/media/Plik:Burqini.jpg

Òbsłëga hotelu zakôzała mùzelmankóm kòrzëstac z basenu w tradicjowim òbleczënkù do kąpielë. Sąd ùznôł to za diskriminacjã.

Rok nazôd w jednym hotelu w Sankt Johann im Pòngaù w zôpadny Aùstrie dwie mùzelmanczi pòszłë sã kãpac do basenu w bùrkini – specjalnym kąpielowim òbleczënkù dlô mùzelmanków i wëznôwcków jinëch religiów, jaczé brónią òdtacëwac swòjégò cała. Òbsłëga hotelu zwrócëła jim ùwôgã, że ni mògą tak òblokłé kòrzëstac z basenu, bò je to niehigeniczné ë przeszkôdzô jinym gòscóm. Mùzelmanczi złożëłë skargã na hotel, przez co lokalné wëszëznë nałożëłë na niegò sto eùro dëtkòwi sztrôfë. Hotel sã òd tegò òdwòłôł do sądu. Latos pòd kùńc czerwińca sprawa bëła rozrzeszonô, a w tim tidzeniu wërok béł dóny do pùbliczny wiadë. Sąd w Salzbùrgù ùznôł, że zôkôz kąpaniô sã w bùrkini béł diskriminëjący, a gôdka ò niehigenicznoscë bùten szëkù, bò ten òbleczënk je robiony z taczich samëch materiałów, co jinszé zortë kąpielowëch òbleczënków. Kòntrole w hotelu téż nie wëkôzałë, żebë pò kąpielë mùzelmanków wòda w basenie bëła lëchszô jak wiedno. Dëtkòwô sztrôfa dlô hotelu òstała ùtrzimónô, a òkróm tegò miôł òn zapłacëc za proces. Wedle kòmentatorów w Aùstrie taczi wërok mô òsoblëwé znaczenié, bò w tim kraju pòpùlarnosc dobiwô skrôwnô prawizna, jakô czãsto wëpòwiôdô sã procëm noszeniémù mùzelmańsczich òbleczënków przez białczi w pùblicznëch placach.

H.S.Sz.

Źródło i opracowanie własne