Na sztërëdniowëch warkòwniach „Remùsowô Kara” w Pùckù ùczniowie pòd òkã sztudérów pògłãbilë swòjã wiédzã ò Kaszëbach i wzãlë ùdzél w mileczny rozegracje.
W dniach òd 10. do 13. rujana dérowałë warkòwnie dlô ùczniów wëżispòdlecznëch szkòłów „Remùsowô Kara”, òrganizowóné przez Karno Sztudérów „Pòmòraniô” dzejającé kòl Kaszëbskò-Pòmòrsczégò Zrzeszeniégò. Ùczãstników przëjachónëch z rozmajitëch nórtów Kaszëb bëlno ùgòscył Harcersczi Mòrsczi Òstrzódk w Pùckù. Szkòlôcë òb sztërë dni zapòznelë sã z dzejaniama „Pòmòranie”, wzãlë ùdzél w czile warkòwniach: lëteracczich, na jaczich pòwstało czile kòmiksów z herojama kaszëbsczich mitów, jãzëkòwëch, na jaczich zagrelë pò kaszëbskù scenë z lubòtnëch filmów i ksążków, a téż w grze w bùczkã z Adamã Héblã.
Òdwiedzelë téż pùcką Hëta Szkła i Mùzeùm m. Floriana Cenôwë a wësłëchelë wëkładu przërôczonégò na tã leżnosc Łukasza Grzãdzëcczégò.
Na kùńc wëjazdu ùczãstnicë „Remùsowi Karë” òdjachelë z darënkama i pamiãcą bëlnégò spãdzeniô czasu z kaszëbską kùlturą i jãzëkã. „To je baro czekawô przigòda dlô wszëtczich lëdzy z wëżispòdlecznëch szkòłów, tej rôczã za rok!” – zachãcywô wiceprzédnik Karna Sztudérów „Pòmòraniô”, Michôł Dereszkewicz.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie