W òdpòwiescë na apelë swòjégò wespółzałóżcë i dejologa Abdullaha Öcalana, òd dwadzesce szesc lat w tërecczi sôdzë, Partiô Robòtników Kùrdistanu latos w maju ògłosëła kùńc zbrojny biôtczi. Terô zaczãła składac barniã.
W piątk jednôstégò lëpińca trzëdzescë biôtkòwników Lëdowi Armie Wëzwòleniô Kùrdistanu, zbrojnégò skrzidła separatisticzny partie, zdjãło larwë ze skarniów i wzãło ùdzél w ùroczëznie znankùjący rozbrojenié òrganizacje, jakô òd tësąc dzewiãcset òsmëdzesątégò czwiôrtégò rokù prowadzëła zbrojną biôtkã, w przédny rédze z tërecczim wòjskã, jakô kòształa żëcé sztërdzescë tësący lëdzy. W òbrëmim dzejaniów dochôdało téż do ataków na cywilów, przez co Partiô Robòtników Kùrdistanu stała sã znónô jakno terroristicznô òrganizacjô. W gromicznikù ùsadzony w tërecczi sôdzë przédnik partie Abdullaha Öcalan wezwôł do rozrzeszeniô partie i złożeniô barnie. W strëmiannikù zarządzëna partie kôzała strzëmac biôtkã, w maju ògłoszoné òstałë planë fùlnégò zjisceniô wezwë Öcalana, a terô wczas ceremònie przed jómą Casene w iracczim parce Kùrdistanu symbòliczno zaczãła proces demilitarizacje. Trzëdzescë biôtkòwników wrzucëło do wiôldżégò kòcła swòje gewérë, maszingewérë i granatniczi, a tej je pòdpôlëło. Partiô ùprzëstãpniła téż òsobòwé pòdôwczi biôtkòwników, żebë pòdczorchnąc wòlã Kùrdów do przeńscô na demòkraticzną fòrmã biôtczi ò wòlnosc. W ùroczëznie wzãło ùdzél kòl sto sztërdzescë òsób z Tërecczi, w tim nôleżnicë legalno tam dzejający kùrdijsczi Partie Demòkraticzny Ùnie, dzejarze prôw człowieka i gazétnicë. Prezydent Tërecczi Recep Tayyip Erdoğan ògłosył, że proces skłôdaniô barnie pòdérëje òd trzech do piãc miesący i bãdą gò dozérałë tërecczé służbë wëdowiédzë.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie