Prezydent Brazylie zawetowôł piãtnôsce procent nowégò ùstawù, jaczi wedle proekòlogicznëch dzejarzów mógł pòdrëchlëc spùszczanié lasów Amazonie.
Prezydent Brazylie Luiz Inácio Lula da Silva pòdpisôł przëjimniãti przez parlament ùstôw zletcziwający sztandardë òchronë strzodowiszcza w dzejanim firmów. Zesztrichnął równak szescdzesąt trzë òd sztërësta artiklów ùstawù, cawno wetëjącë dwadzesce szesc, a trzëdzescë sétmë czerëjącë do pòprôwczi. Òkrãża zrzeszoné z òchroną strzodowiszcza, jaczé projekt dokùmentu nazéwałë „ùstawą ò dewastacje”, ògłosëłë zwënégã. W rëmniãtëch artiklach nalazłë sã midzë jinszima zapisënczi ùmòżebniwającé firmóm pòdjimanié inwazjowëch inwesticjów na chrónionëch òbéńdach pò złożenim zwëczajny deklaracje ò słëchanim strzodowiszczowim reglóm, bez mùszebnotë przechôdaniô kòntrolów i zgòdë òpiekùnów òbéńdë. Nôwikszé òbawë bëłë związóné z dalszim spùszczanim amazońsczich lasów żebë zrobic plac na nowé inwesticje, co je dzysdnia w Brazylie pòwszechnym jiwrã, a nowi ùstôw w fùlny pòstacje mógłbë jesz ten proces pòdrëchlëc. Miriam Belchior, sekretôrz rządu prezydenta Lulë, zapòwiedzała, że miast zabédowónëch przez parlament zletczeniów wprowadzoné òstóną przepisë mającë skùpic sã na wspiarcym nôwôżniészich strategiczno projektów, ale téż ùprawienim dzysdniowëch luków w prawie, przez jaczé inwestorzë dzejają na zaszkòdã strzodowiszcza.
H.S.Sz.
Twoje zdanie jest ważne jednak nie może ranić innych osób lub grup.
![Co? Dze? Czedë? [30.06-6.07]](https://cdn.cmc-gallery.pl/static/files/gallery/590/thumb__1699237_1751271124.webp)
Komentarze opinie