Reklama

Ùkrajina ògłôszô wëcopanié sã z òttawsczi kònwencje

Klëka

30/06/2025 13:46

https://en.wikipedia.org/wiki/Volodymyr_Zelenskyy#/media/File:Volodymyr_Zelenskyy_in_2022.jpg

Ùkrajina pòszła szlachã swòjich sąsadów, midzë jinszima Pòlsczi. Traktat równak wcyg bãdze zakazéwôł ji brëkòwaniô procëmpiechòtnëch minów jaż do zakùńczeniô wòjnë z Rusją.

W niedzelã dwadzestégò dzewiątégò czerwińca prezydent Ùkrajinë Wòłodimir Zełeńsczi pòdpisôł dekret ò wëstąpienim z òttawsczi kònwencje, jakô zakazéwô produkcje i brëkòwaniô procëmpiechòtnëch minów państwóm, jaczé pòdpisałë dokùment, dôwającé bôczenié na stolëmné drãgòtë w rozminowiwanim rôz zaminowónëch teritoriów i wielelatną zagrôżbã dlô rodë i cywilów nawetka pò zakùńczenim wòjnë. Ùkrajina swòjã decyzjã argùmentëje brëkòwnotą òbarnë kraju w òbliczim zagrôżbë ze starnë państwa, jaczé ti kònwencje ni mô pòdpisóné, to je Rusje. Tak Ùkrajina doparłãczëła do państwów, jaczé wëcopanié sã z ùgôdënkù zapòwiedzałë latos w strëmiannikù: Estońsczi, Fińsczi, Lëtwë, Łotewsczi ë Pòlsczi. Wedle pòstanowieniów samégò dokùmentu, weńscé w żëcé wëpòwiedzeniô ni mòże nadéńc chùdzy jak pół rokù pò przekôzanim decyzje do Òrganizacje Zjednónëch Nôrodów, a w dodôwkù ni mòże nastąpic przed zakùńczenim przez państwò wszëtczich zbrojnëch kònfliktów, w jaczich bierze òno ùdzél. To bë znaczëło, że stosowanié procëmpiechòtnëch minów przez Ùkrajinã w terny wòjnie z Rusją bãdze złómanim midzënôrodnégò prawa.

H.S.Sz.