Reklama

Mòngòlskô złómała Rzimsczi Sztatut, bò nie aresztowała Pùtina

Klëka

27/10/2024 07:58

Haga ùznała, że zachòwanié mòngòlsczégò państwa złómało regle przëjãté przez kraje, chtërne pòdpisałë Rzimsczi Sztatut.

W czwiôrtk 24. rujana Midzënôrodny Sztrôfny Tribùnał ùznôł wëszëznë Mòngòlsczi za winné złómaniô Rzimsczégò Sztatutu, jaczi nakazéwô jegò sygnatariuszóm zatrzëmiwanié na swòjim teritorium lëdzy òbjimniãtëch midzënôrodnym nakazã aresztowaniô i przekazéwanié jich sądowi w Hadze. Mòngòlskô nie zjiscëła tegò òbrzészkù, czej latos w séwnikù do tegò kraju przëjachôł prezydent Rusczi, Władimir Pùtin. Tribùnał w Hadze miôł za nim wëdóné nakôz aresztowaniégò za wòjnowé przesprawë, jaczima bëło wëwòżenié dzecy z òbsadzonëch terenów Ùkrajinë do Rusje.

Jesz przed pòtkanim rusczégò wódcë z prezydentã òbskôrżonégò kraju Uchnaagijnã Chürelsüchã mòngòlsczi rząd zapòwiôdôł, że Pùtin nie òstónie aresztowóny z pòzdrzatkù na to, że Mòngòlskô je zanôleżno òd Rusczi w kwestie energeticzi.

Reklama

Séwnikòwé òdwiôdënë Pùtina w sąsednym kraju minãłë bez niżódnëch próbów realizacje pòstanowieniów Midzënôrodnégò Tribùnału. Sprawa niedofùlowaniô òbrzészkù przez Mòngòlskã òstónie rozsądzonô przez Gromadã Państwów Starnów Rzimsczégò Sztatutu.

H.S.Sz.

Czytaj nas w Google

Dodaj do Google

Źródło i opracowanie własne