Kònferencjô pòmòrsczi wòjewòdë tikała sã témë zagrôżbë na Pòmòrzu na skùtk nadchôdający zôlewòwi dënëdżi, a téż pòmòcë dlô regionów dotkłëch katastrofą.
Wczora na prasowi kònferencje pòmòrskô wòjewòda Béjata Rutkewicz òdpòwiôdała na pitania ò bezpiek w naszim regionie w związkù z drãgą stojizną w pôłniowò-zôpadny Pòlsce. „Pò infòrmacjach, jaczé më ùczëlë na zéńdzenim krizysowégò sztabù, mòżemë rzec, że nasz región je w bezpiekù, ale mùszimë miec bôczenié i bëc przërëchtowóny” – gôdała wòjewòda. Pòcwierdzoné òstałë infòrmacje, że wiôlgô dënëga na Wisle, jakô mô na Pòmòrzé duńc za kòl 2 tidzenie, mô bëc splaskaconô dzãka zbiérnikòwi we Włocławkù. Rówizna wòdë we Wisle nie wëchôdô nad alarmòwé stanë.
Na kònferencje bëła téż gôdka ò włączenim pòmòrsczich służbów do pòmòcë pôłniowim wòjewództwóm i wësłanim na òbéndã, co je w zagrôżbie, ògniowi starżë, szandarów a téż żôłnérzów Òbéńdowi [Teritorialny] Òbarnë. Jinszą fòrmą pòmòcë mòże bëc przëjãcé przez pòmòrsczé szkòłë ùczniów z zalónëch gminów, co bë sã dało zwënégòwac pò werifikacje przistãpnoscë placu w internatach, a téż òrganizacjô terapeùticznëch rézów dlô szkòlôków.
Twoje zdanie jest ważne jednak nie może ranić innych osób lub grup.
Komentarze opinie