Sąd skôzôł lëdzy, co òrganizowelë niewòlniczą prôcã na winowi plantacje dlô robòtników z Africzi.
Francësczi sąd wëdôł wëroczi za wëzwëskiwanié robòtników jak niewòlników w szampańsczi winnicë Châlons-en-Champagne. Inspekcjô robòtë w séwnikù dwa lata nazôd skòntrolowała plac ùprzëstãpniony robòtnikóm na zakwatérowanié i scwierdzëła warënczi pòwôżno zagrôżającé żëcémù i zdrowiémù mieszkającëch tam òsób. Szło ò złą stojiznã higienë, ùszkòdzoné elektriczné instalacje i felënk spòdlowëch mediów jak wòda i sztróm. Wedle zeznaniów robòtników, w przédny rédze z afrikańsczich krajów, pòdwëższi na noc jich w bùdinkach zasztëkiwelë, a w dzéń kôzelë robic na plantacje winnëch grónków òd piąti reno do szósti wieczór, przez co òni sã czëlë jak niewòlnicë. Sąd skôzôł trzë òsobë: Direktórkã winiarsczi firmë Anavim, białka z Kirgistanu, jakô òdpòwiôda za òrganizacjã taczi prôcë, nielegalné najimanié cëzyńców i płacenié jim môłégò abò niżódnégò mita, a téż dwaji chłopi, co zajimelë sã samim szukanim za robòtnikama. Białka òstała skôzónô na sztërë lata sôdzë, w tim dwa z zawieszenim, jeden chłop na rok sôdzë, a drëdżi na dwa lata z zawieszenim na rok. Do tegò sąd zażądôł rozrzeszeniô firmë Anavim i skôzôł spółdzelniã, jakô brëkòwała ji ùsłëgów, na sztrôfã sétmëdzesąt piãc tësący eùro.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie