PGE i Ørsted wespół z wëcmanizną Istrana wczora pòdpisałë dogôdënk arãdë nowégò terminala, jaczi mô bëc pòstawiony do kùńca 2026 rokù. Mô pòsłëżëc bùdacje wiatrowi farmë na Wiôldżim Mòrzu.
Baltica 2 to projekt mòrsczi wiatrowi farmë na Bôłce, jakô mô pòwstac kòl 40 km òd sztrądu na dłużawie midzë Ùstką a Chòczewã. 107 turbinów ò pòspólny mòcë 1498 MW rozstôwionëch na wiéchrzëznie 190 km² mô produkòwac z wiatru sztróm dlô kòl 2,4 mln òdbiérców. W Òsekach kòl Chòczewa mô bëc pòstawionô transfòrmatorowô stacjô sparłãczonô z turbinama na mòrzu przez pòdzemné kable. Realizacją projektu zajimô sã karno PGE w wëcmaniznie z dëńsczim Ørsted.
Bùdacjô terminalu T5 mô sã skùńczëc pòd kùńc 2026 rokù. W nim elementë dlô mòrsczich wietrzników bãdą przechòwiwóné, wstãpno mòntowóné a téż ladowóné na òkrãtë. W tim placu instalacjowé òkrãtë bãdą téż pòddôwóné wszelejaczi brëkòwny òbsłëdze. Dzãka temù bùdacjô farmë na mòrzu mô bëc zjiszczonô do kùńca 2027 rokù.
Wëcmanizna PGE i Ørsted mô téż w planach bùdacjã pòstãpnégò etapu projektu wiatrowi farmë na Bôłce, pòzwónégò Baltica 3. Te planë równak sygają kùńca ti dekadë. Pòspólnô mòc farmë Baltica mô miec 2,5 GW, co òznôczô leżnosc dotëgòwiwaniô sztrómù do wnet 4 mln òdbiérców.
Twoje zdanie jest ważne jednak nie może ranić innych osób lub grup.
Komentarze opinie