Genueńsczi cyklón Bòris grzimnął w Aùstriã, Czeskã, Słowackã, Rumùńskã a téż Pòlskã. Całé gardë są ju zalóné wòdą z dobierającëch rzék, a skùtczi tegò krizysu mògą òkazac sã stolëmné.
Szlaga błądzy pò westrzédny Eùropie. Na niedzelã 15. séwnika je wiedzec ò dwanôsce smiertnëch òfiarach warającégò òd czwiôrtkù cyklonu, w tim dwùch w Pòlsce. Tësące chëczi òstało zalónëch, dérëją ewakùacje môlëznów nad dobierającyma rzékama a téż akcje pòmòcë dlô mieszkańców w pòtrzébie. Wedle meteòrologów òstré deszcze mają skùńczëc sã we wtórk, ale je gwës, że skùtczi zôlewów bãdze czëc we wiele regionach w Aùstrie, Czesce, Słowacce, Rumùńsce i pòłniowi Pòlsce przez dłudżi czas. Padawiszczu towarzi mòcny wiater, a w Aùstrie w górsczich òbéńdach przëszłë krzëkwë i snieżné lawinë.
W sobòtã wieczór specjalny òddzél ògniowi starżë z pòmòrsczégò wòjewództwa rëgnął z Dërszewa na pôłnié Pòlsczi na pòmòc mieszkańcóm kłodzczégò krézu i Czãstochòwë. Wòjewództwóm biôtkùjącym z bôłdzą pòmògą téż ògniarze z zôpadnopòmòrsczégò i kùjawskò-pòmòrsczégò, jaczi òstele sczerowóny na Dolny Szląsk, jakno jeden z nôbarżi zagrożonëch regionów Pòlsczi.
Strzód kòmentëjącëch we wszëtczich dotkłëch cyklonã krajach zamanówszë pòjôwiają sã zesadzenia dzysdniowégò wiodra z tak pòzwónym „zôlewã tësąclatégò” z 1997 rokù, czej skùtkã szlachòwnëch szlagów bëła smierc 114 sztëk lëdzy i stratë òbtaksowóné na 4,5 mld amerikańsczich dolarów.
Twoje zdanie jest ważne jednak nie może ranić innych osób lub grup.
Komentarze opinie