Reklama

Pierszé ùżëcé kapsułë do sãzabicégò w Szwajcarsce

Klëka

25/09/2024 11:15

Ze swiata, Pierszé ùżëcé kapsułë sãzabicégò Szwajcarsce - zdjęcie, fotografia

Pòmôgający w ùżëcym kòntrowersjowi kapsułë òstele zatrzimóny.

We wtórk 24. séwnika prokùratura szwajcarsczégò kantonu Szafùza dała do wiadë, że rëgnãło pòstãpòwanié procëm karnu lëdzy, jaczi dzéń przódë pòmòglë 64-latny òbëwatelce USA w pierszim w historie sãzabicym z ùżëcym specjalny eùtanazjowi kapsułë Sarco zaprojektowóny przez Philipa Nitschke, promòtora legalizacje eùtanazje i wspòmôgónëch sãzabiców. Szandarzë zatrzimelë ju swiôdków zdarzeniô, do jaczégò doszło w môlëznie Merishausen, niedalek grańcë z Niemiecką.

Kapsuła Sarco òstała òficjalno zaprezentowónô latos w lëpińcu przez òrganizacjã Last Resort, jakô zapòwiedza ji chùtczé dopùszczenié do ùżëtkù w Szwajcarsce. Wënalôzk je wëtwôrzóny z ùżëcym drëkù 3D. Òsoba chcącô zakùńczëc swòje żëcé pò wpisanim znónégò leno sobie kòdu mùszi pòłożëc sã w kapsule i òdpòwiedzec na czile pitaniów pòcwierdzywającëch ji swiądã co do skùtków procesu. Pò tim kapsuła wëdzéliwô azot jaczi w kòl minutã prowadzy do smiercë przez felënk krzisenia.

W Szwajcarsce wspòmôgóné sãzabicé je legalné òd 40. lat ùszłégò stalatégò, równak kapsuła Sarco je kòntrowersjowô. W pòniedzôłk ministra bënowëch sprôw Szwajcarsczi pòwiedzała, że ùrządzenié je niezgódné z prawã, bò nie zjiscywô wëmôganiów bezpiekù.