Do piãcpùnktowégò planu przëdóné są krëjamné wiadë namienioné do przekôzaniô wëbrónym krajóm, jaczé òkazywają wspiarcé biôtkùjący Ùkrajinie.
We strzodã 16. rujana prezydent Ùkrajinë Wòłodimir Zełensczi ògłosył w ùkrajińsczim parlamence w Kijiwie piãcpùnktowi plan dobëcégò w mãczący krôj wòjnie cygnący sã òd 2014 rokù. Ùkrajińsczi wódca gôdôł ò mùszebnoce nastawieniô na dobëcé Ùkrajinë nad Ruską, a nié na bédënkach miru na warënkach procëmnika. Do ògłoszonëch piãc pùnktów są doparłãczoné téż trzë krëjamné przëdôwczi, jaczich zamkłosc je znónô zdrësznikóm Ùkrajinë. Zełensczi zapòwiedzôł pòwtórzenié przedstôwkù planu na eùropejsczim fòrum, pòdsztrichiwającë, że jegò realizacjô zanôleżi òd pòstawë państwów Zôpadu.
Piãc pùnktów jaczé mają zagwësnic Ùkrajinie dobëcé to przërôczenié Ùkrajinë do NATO, ùmòcnienié ji òbarnë procëm rusczim sëłóm, zasztopanié Rusczi dzãka nienuklearnémù „òdstrôszającémù pakétowi”, òbarna ùkrajińsczich nôtërnëch zôsobów przez USA i Eùropejską Ùniã, a w pòwòjnowim cządze téż zastąpienié niechtërnëch amerikańsczich wòjskòwëch jednostków òstôwającëch w Eùropie ùkrajińsczima. Je widzec z tegò, że narracjô prowadzonô przez Zełensczégò nié blós skùpiwô sã na sami wòjnie, ale w ji zwëskòwnym zakùńczenim widzy téż szansã na ùmòcnienié pòzycje Ùkrajinë w Eùropie.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie