Reklama
Pôłniowô Kòreja grozy Japònie w sprawie dzewiãcdzesąt òstrowów
16/07/2025 11:49
W dokùmence ministerstwa òbarnë Japòniô przëbôczëła swòje pretensje do karna òstrowów, na chtërnëch Kòreja trzimie pòsterunk pòlicje.
We wtórk piãtnôstégò lëpińca japòńsczi rząd òpùblikòwôł coroczny rapòrt ò sprawach òbarnë kraju. W ùszłëch latach biwôł òn przistãpny blós w elektroniczny wersje, le latos rząd dôł gò do drëkù i rozesłôł do szkół. Rząd Pôłniowi Kòreji zareagòwôł òstro na zamkłosc dokùmentu, a przédno na prezentérowóny przez Japòniã pòzdrzatk na teritorialny status karna dzewiãcdzesąt môłëch òstrowów i kòralowëch rafów na Japòńsczim Mòrzu, nazéwónëch przez Japòńczików Takeshima. Wedle rapòrtu jich status òstôwô nierozrzeszony, ale są òpisóné jakno part japòńsczégò teritorium. Pôłniowô Kòreja téż ùznôwô te òstrowë za swòje i zwie je Dokdo. Rzecznik pôłniowòkòrejańsczégò Ministerstwa Bùtnowëch Sprôw Lee Jae-woong zapòwiedzôł dotëgòwanié protestacjowëch nótów do ambasadë Japònie w Seùlu z wezwą do wëcopaniô cwierdzeniów ò przënôleżnoscë archipelagù do Japònie, z grozbą òstri òdpòwiescë ze starnë Kòreji. Òba kraje ju òd dłëgszégò czasu sztridëją sã ò òstrowë, jaczé prakticzno ni mają mieszkańców, ale są chãtno òdwiédzóné przez turistów. W wòdach wkół nich je fùl rib i jiny mòrzëznë, a pòd mòrsczim dnã docygô sã wëstãpòwanié bòkadnëch złożów gazu. Archipelag biwô téż nazéwóny Òksëpama Liancourta, òd pòzwë francësczégò wiôlgòribniczégò òkrãtu „Le Liancourt”, jaczi sã wnetka rozbił w tim òkòlim w tësąc òsmëset sztërdzestim dzewiątim rokù.
H.S.Sz.
Reklama
Podziel się swoją opinią
Twoje zdanie jest ważne jednak nie może ranić innych osób lub grup.
Reklama
Wideo
Reklama
Komentarze opinie