Na Gintaùtasa Paluckasa òbrzészk zapłaceniô Wilnu szestnôsce i pół tësący eùro òstôł nałożony za przekrãtë, jaczich sã dopùszcziwôł robiącë w administracje gardu.
Dzysdniowi premiéra Lëtwë Gintaùtas Paluckas òstôł skôzóny w dwa tësące dwanôstim rokù przez Nôwëższi Sąd w tak pòzwóny „sprawie szërów” za to, że jakno direktór administracje Wilna nadùżiwôł włôdzë przez przëstojiwanié miesczi wëcmaniznie zajimający sã deratizacją. Dostôł tedë dwa lata sôdzë w zawieszenim, a téż òbrzészk zapłaceniô miastu równozaczënë szestnôsce i pół tësący eùro, a czas miôł na to wëznaczony do dwa tësące piãtnôstégò. W dwa tësące sztërnôstim zapłacył jednôsce tësący piãcset òsmëdzesąt eùro w gòtówce – òbszczãdnosców gwôsnëch, rodzëznë i znajomëch. Òstałą sëmã równak wpłacył dopiérze latos, ósmégò lëpińca. Pò przëzdrzenim sã sprawie i rozgłoszenim ji przez gazétników pòjawiłë sã wątplëwòscë, czë òstôł legalno wëbróny na pòsélca do Sejmù, czej wedle lëtewsczégò welownégò kòdeksu bez wëkònaniô skôzëjącégò wërokù skôzóny ni mòże brac ùdzélu w welacjach. We wtórk dwadzestégò drëdżégò lëpińca Departament Infòrmaticzi i Kòmùnikacje Ministerstwa Bënowëch Sprôw wëwidnił, że wërok wëdóny w sztrôfnym procesu òstôł rëmniãti z kartoteczi Paluckasa w dwa tësące trzënôstim rokù, a òbrzészk zapłaceniô dëtków wileńsczi samòrządzënie béł na niegò nałożony w cywilnym procesu. Sóm Paluckas tłómaczi sã, że z òddanim néżny sëmë mùdzył tak długò blós dlôte, że zabéł zapłacëc i nicht mù nie przëbôcził.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie