Reklama

Priwatnô armiô barni ùszłégò prezydenta

Klëka

26/05/2026 11:02

Evo Morales. Òdj. EneasMx; zdrzódło: https://pl.wikipedia.org/wiki/Evo_Morales#/media/Plik:Evo_Morales_Ayma_(cropped_3).jpg

W môlu zamieszkaniô Evo Mòralesa pòwstôł richtich festung, òbsadzony wielnyma starżnikama. Brëkùją wszëtczégò òd primitiwnëch péków pò mòderną barniã.

Òd dimisje Evo Mòralesa z ùrzãdu prezydenta Bòliwie w dwa tësące dzewiãtnôstim rokù, prokùratura przedstawiła pòlitikòwi drãdżé òbwinë. Jakno prezydent miôł ùtrzëmiwac seksualné relacje z piãtnôscelatnym dzéwùsã. Jegò starszim za zgòdã na ten związk miôł bédowac pòliticzny profit. Za to prokùratura òbwinowała gò ò gwôłt i hańdel lëdzama, zgòdą z klasyfikacją taczich czënów wedle bòliwijsczégò prawa. Mòrales do tegò sã nie przëznôwô. Chòc je za nim wëdóny nôkôz aresztowanié, òn sã nie ùkriwô, nie wëjéżdżô, dali dzejô pòliticzno. Mieszkô w môlëznie Lauca Eñe w prowincje Chapare, gdze barnią gò jegò przëstojnicë, a òn sóm pòtikô sã z gbùrama ùprôwiającyma kòkã – nôrodną ùżiwkã Bòliwijczików. Òd zôczątkù stëcznika równak jegò aktiwnosc bëła mòcno ògrańczonô pò tim, jak z Wenezuelë Amerikanie pòrwelë Nicolasa Madurã. Krótkò pòtemù równak wrócył do aktiwnoscë w mediach i nazôd zaczął przëjimac wizytë. Wedlë slédnëch repòrtażów, wkòl mieszkaniô Mòralesa lëdze zbùdowelë festung òbtoczony palisadą z drzewianyma rozezdrzélnicama, z jaczich jegò starżnicë wëzérają nadjéżdżającëch aùtołów. W festungù i jegò òkòlim przebiwô czile tësący gbùrów z samòróbnyma òdczidnicama i pékama, a téż karno blëżi nierozpòznónëch lëdzy z bùtna Bòliwie, z barnią wëższi kwalitë. Jegò przëstojnicë pilëją dróg w òkòlim, a w pòłowie maja zablokòwelë latawiszcze, z jaczégò miało rëgnąc karno szandarów wësłónëch pò Mòralesa. Rząd nie decydëje sã jesz na wësłanié wòjska, żebë nie dopùscëc do niebrëkòwnégò rozlewù krëwie.

H.S.Sz.

Źródło i opracowanie własne