Demònstracje procëm ùstawòwi pòdpisónémù we wtórk przez Zełeńsczégò bëłë nôwikszima protestama procëm dzejanióm rządu òd inwazje Rusczi na Ùkrajinã w dwa tësące dwadzestim drëdżim rokù.
W pòniedzôłk dwadzestégò pierszégò lëpińca ùkrajińsczé służbë zrobiłë rewizje w sedzbach Nôrodnégò Antikòrupcjowégò Bióra Ùkrajinë i Specjalisticzny Antikòrupcjowi Prokùraturë, przez co dwie òsobë òstałë zatrzimóné na spòdlim òbwinów ò wespółrobòtã z rusczima specjalnyma służbama. We wtórk ùkrajińsczi parlament przegłosowôł ùstôw, jaczi te dwie institucje ùsôdzô pòd rządë Generalny Prokùraturë Ùkrajinë. Akt òstôł pòdpisóny przez prezydenta Wòłodimira Zełeńsczégò, co dorazu sprawiło wałã protestów na szasëjach – lëdze wërazëlë swój lãk ò skùtczi ùzanôleżnieniô antikòrupcjowëch institucjów òd jinëch rządowëch òrganów, wskazéwającë na zôszkòdã dlô integracje Ùkrajinë z eùropejską pòspólnotą, co dzejô na zwësk planów Rusczi. Protestë we wtórk, strzodã i czwiôrtk bëłë zrëchtowóné w sétmënôsce gardach Ùkrajinë, w tim w Kijiwie, gdze we wtórk na demònstracjã przëszło przez tësąc dwasta lëdzy. Do Zełeńsczégò zwòniła téż prowôdniczka Eùropejsczi Kòmisje Ursula von der Leyen, żebë przestrzéc, że niezanôleżnosc antikòrupcjowëch institucjów òstôwô jednym ze spòdlowëch warënków przëjimniãcô Ùkrajinë do Eùropejsczi Ùnie w przińdnoce. We czwiôrtk Zełeńsczi dôł do wiadë, że zacwierdzył i przekôzôł parlamentowi projekt ùstawù, jaczi miôłbë ùmòcnic prawòrządnosc w Ùkrajinie i pòdtrzëmac niezanôleżnosc institucjów.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie