Sprôwca mógł bëc pòd cëskã psychòaktiwnëch substancjów. Przed przëjachanim szandarów zatrzimôł gò swiôdk.
W nocë z sobòtë na niedzelã (z ósmégò na dzewiątégò gromicznika) w Rëmie szandarzë z kòmisariatu w Rédze dostelë zgłoszenié ò nôscelatkù psëjącym aùtołë zaparkòwóné na szasëje. Pò przëjachanim na plac, zatrzimelë pòbùdzonégò sétmënôscelatka, jaczégò przódë ò pierszi w nocë przed dalszim niszczenim zascygnął swiôdk zdarzeniô. Wstãpno pòlicjô scwierdzëła, że ti nocë knôp skazył kòl sztërdzescë aùtołów – miałë pòbité zdrzadełka i pòprzebijóné réfë. Służbë dali bãdą przezérałë nagrania z mònitoringù, żebë ùgwësnic sã, czë zatrzimóny nie zrobił wicy zaszkòdów. Sprôwca òstôł zamkłi w jizbie dlô zatrzimónëch. Szandarzë szukają za miéwcama ùszkòdzonëch aùtołów i zajimną sã òbtaksowanim prizu za ùszkòdë.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie