Fòrt Stewart to nôwikszô wòjskòwô baza w Zjednonëch Stanach na wschód òd rzéczi Missisipi. Atakòwnik miôł doznawac rasyzmù ze starnë jinëch żôłnérzi.
We strzodã szóstégò zélnika w wòjskòwi baze Fòrt Stewart w amerikańsczim stanie Georgia dwadzesceòsmëlatny serżant Quornelius Radfòrd brëkùjącë gwôsnégò pistóla zaczął strzelac do kamrôtów z jednostczi. Chùtkò piãc nieùzbrojonëch żôłnérzi rëszëło na atakòwnika, czej ùczëło zwãk wëstrzałów. Ga ùdało jim sã wërwac mù barniã, jeden z nich gò ùskrzënił i przez pół gòdzënë przëtrzëmiwôł jaż do jegò zatrzimaniô, a néga zaczãła ùdzelëwac pòmòcë renionym, doparłãcziwającë do jesz jedny serżantczi, jakô pòmôgała jesz czedë atakòwnik strzélôł nad ji głową. Dzãka jich chùtczi reakcje skùńczëło sã na piãc renionëch żôłnérzach, w tim dwùch cãżkò, ale z bëlnyma perspektiwama na wëzdrowienié. Całô szóstka òstała òdznaczonô za herojską pòstawã. Armiô nie pòdała, jaczi béł mòtiw atakòwnika, ale jegò òjc dôł medióm do wiadë, że serżant Radfòrd miôł starã ò przëniesenié do jinszi bazë i skarżił sã na rasyzm, jaczégò miôł doznawac òd kamrôtów, a reno w dzéń atakù wësłôł swòji cotce wiadã, w jaczi zapòwiôdôł, że niedługò bãdze w lepszim placu, bò mô ùdbóné cos zrobic. Zatrzimóny atakòwnik nigdë nie biôtkòwôł na wòjnie, przed atakã béł le rôz aresztowóny za jazdã pò alkòholu, ò czim armiô nie wiedzała.
H.S.Sz.
Twoje zdanie jest ważne jednak nie może ranić innych osób lub grup.
![Co? Dze? Czedë? [30.06-6.07]](https://cdn.cmc-gallery.pl/static/files/gallery/590/thumb__1699237_1751271124.webp)
Komentarze opinie