W piątim dniu sznëkrowaniô pò lasach za sprôwcą strzélindżi w Môłi Wsë kòl Limanowi òperacjô sã skùńczëła. Tadeùsz Duda nie żëje.
Òd piątkù dwadzestégò sódmégò czerwińca w Môłopòlsce dérowała szëkba za piãcdzesątsétmëlatnym Tadeùszã Dudą, pòdezdrzónym ò zastrzelenié swòji córczi, zãca i pòstrzelenié starczi w Stôri Wsë w limanowsczim krézu w môłopòlsczim wòjewództwie. Chłop ùcekł z placu zbrodnie, a aùtół òstawił pòd lasã. W òbławie na niegò wzãło ùdzéł czileset szandarów i zôłnérzów, wëzwëskóné bëłë dronë i helikòpter. Wëstawiony béł za nim scëgòwny lëst i piãcdzesąt tësący złotëch nôdgrodë òd wòjewódzczégò kòmendanta pòlicje za infòrmacje, chtërnë bë direktno doprowadzëłë do jegò zatrzimaniô. Prowadzoné téż bëłë kòntrolë aùtołów przejéżdżającëch w òkòlim, w tim téż na grańcë ze Słowacką. W kùńcu szëkba skùńczëła sã we wtórk pierszégò lëpińca – służbë natrafiłë wpół do dzewiąti wieczór na cało Tadeùsza Dudë z reną w głowie òd pòstrzału – chłop sóm ze sobą skùńcził. Pòcwierdzëła to nalazłô kòl niegò barniô. Minister Bënowëch Sprôw i Administracje Tomôsz Semòniôk pòdzãkòwôł wszëtczim wspiérającym òbławã na mòrdarza.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie