Brzôd wespółrobòtë Zrzeszeniô z samòrządã pòd prowadnictwã wójta Riszarda Kalkòwsczégò Kaszëbi mòglë òbaczëc w sobòtã piątégò lëpińca.
Dwadzesti szósti Swiatowi Zjôzd Kaszëbów, jaczégò gòspòdarzã latos béł Szëmôłd, zbiégł sã z ùroczëstim òdtacenim pierszi tôflë ekspresowi drodżi S6 z nôdpisã „Kaszëbskô Darga”. Na sóm zjôzd z Kartuz przez Trzëgard do Lëzëna pòjachała bana Transcassubia – z Lëzëna do Szëmałdu przewiozłé jich aùtobùsë. Gòsce z jinëch partów Kaszub òrganizowelë so dojôzd na gwôsną rãkã. Na stadionie przë spòrtowi szasëje w Szëmałdze jak wiedno na zjazdach ùczãstnicë mielë leżnosc jic na mszã z kaszëbsczima czëtaniama, wzyc ùdzél w turniérach w kaszëbsczé grë, zrobic kùpisze na rozstawionëch krómach, pòsłëchac wëstąpieniów pòlitików, dzejarzów Kaszëbskò-Pòmòrsczégò Zrzeszeniégò, a téż artistów kaszëbsczich i pòlsczich. Bité bëłë téż rekòrdé na lëczbã lëdzy grającëch na diabelsczich skrzëpicach i na nôwikszą kaszëbską fanã, a lubòtnicë ksążków òdwiedzëc mòglë Kaszëbsczé Ògrodë Lëteraturë. Przëznôwónô przez Òglowi Zarząd Kaszëbskò-Pòmòrsczégò Zrzeszeniégò Bùrsztinowô Klëka za apartną dbã ò kaszëbsczé sprawë trafiła do bùrméstra Brusów Witolda Òssowsczégò. Klëkã dlô òrganizatora przińdnorocznégò zjazdu przëjãła prezydentka Gdinie Alekandra Kòsork – gard za rok fejrëje stolaté swòjich miesczich prawów i z ti leżnoscë bãdze gòspòdarzã zjazdu.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie