Sztrid papieża z amerikańsczim prezydentã

Dwaji wierã nôwôżniészi dzysdnia Amerikanie na swiece są w sztridze. Donald Trump szkalëje na papieża na spòlëznowëch mediach, a papiéż Léón rzecze, że z Trumpã nie mdze diskùtérowôł.

Papiéż Léón w slédnym czasu barżi abò mni dosłowno òdnôszôł sã w swòjich wëpòwiescach do pòliticzi Zjednónëch Stanów. Wzéwôł do miru i skùńczeniô wòjnë w Iranie, a téż kritikòwôł agresywną narracjã prowadzoną przez prezydenta Zjednónëch Stanów Donalda Trumpa. Ten na swòji platfòrmie Truth Social zapòwiôdôł nawet znikwienié całi cywilizacje. Sztrid sã robił corôz òstrzészi. Wiceszef Pentagònu wezwôł do sebie nuncjusza kardinała Christophe'a Pierre'a. Wedle nieòficjalnëch infòrmacjów na jich zetkanim miałë nawet pasc grozbë i sugestie pòwtórzeniô awiniońsczi niewòlë, czemù prôwdac zaprzékòwałë pòtemù tak Pentagón jak Watikan. W amerikańsczi télewizjë pùscëlë téż program ò kriticznym pòzdrzatkù papieża na pòlitikã Trumpa, z wëdowiédzama z amerikańsczima kardinałama, chtërny przëznelë, że wòjnë z Iranã ni mòże pòzwac sprawiedlëwą wòjną.
W niedzelã dwanôstégò łżëkwiata wieczór Donald Trump wëprodukòwôł na Truth Social pòstãpny pòst, tą razą direktno wëmierzony w papieża Léòna. Pòzwôł gò słabim procëm przesprawiémù i tragicznym w zagrańczny pòlitice. Gôdôł, że wòli jegò brata Louisa, jaczi całim sercã pòpiérô jegò doktrinã Make America Great Again. Scwierdzył, że czejbë òn nie béł prezydentã, kardinał Prevost nie òstôłbë papieżã, bò jakno Amerikón béł wëbróny dlô dogôdaniô sã z nim. Napisôł, że nie chce papieża, chtëren kritikùje prezydenta Zjednónëch Stanów. W gòdzënã pòtemù ùprzëstãpnił wëgenerowóny przez sztëczną inteligencjã òbrôzk, na jaczim òn sóm przezeblokłi za Jezësa ùzdrôwiô chòrégò kładzącë wid na jegò skarniã. Winowóny ò rąganié ë stôwianié sã w rolë Mesjasza Trump pòtemù wëwidnił gazétnikóm, że òbrôzk miôł symbòliczno gò przedstawiac jakno robòtnika Czerwionégò Krziża i nie bëło w tim niżódnégò religiowégò nawleczeniô.
Samégò Papieża Léòna pitelë ò kritikã ze starnë Trumpa, czej òn lecôł fligrã do Algeru na apòsztolską rézã do Africzi. Biskùp Rzimù òdrzekł, że nie je pòlitikã, nie chce wchadac w diskùsjã z Trumpa i nie òprzestónie wëpòwiadac sã procëm wòjnie, a za mirã, dialogã i wielestarnym pòdchôdanim do jiwrów. Pòdczorchnął, że administracje Trumpa sã nie bòji ë dali bãdze głosno gôdôł ò przekazu Ewanielie, dlô jaczégò dzejô Kòscół.

H.S.Sz.